Rusiye polisiniñ hadimleri Aqmescitteki Rusiye FSB idaresiniñ binası ögünde tutulğan ve daa soñra yiberilgen qırımtatar faalleriniñ evlerine kelip başladı. Polis hadimleri «körüşip laf etmege» teklif ete, dep bildire «Qırım birdemligi» birleşmesi.
Birleşme malümatına köre, Vladlen Seydaliyev evde olmağanda Aqmescit rayonındaki Rusiye İç işler nazirliginiñ idaresinden eki hadim keldi. Tuvğanları evde olmağanını aytsa, uquq qoruyıcılar Seydaliyevge telefon etip, körüşmege teklif etti.
«Subetniñ mevzusını sorasam, telefonda aytılmaz, dep cevap berdiler. Neticede maña ya da tuvğanlarıma celpname berseler, bölükke advokatnen kelirim, dep añlaştıq», – dep tarif etti Seydaliyev.
Birleşme qayd etkenine köre, sentâbrniñ 4-nde Seydaliyev Aqmescitteki Rusiye İç işler nazirliginiñ Merkeziy idare polisiniñ hadimleri tarafından tutulğanlar arasında edi. Adise yerinden yayın yaptı. Er adamnıñ aytqanına köre, tutqanda qaburğasına urdılar. Tirenmedi, dep ayta Seydaliyev.
Rusiye quvet qurulışları faallerniñ poliske çağırılğanına dair malümatnı resmiy şekilde tefsir etmey.
Qırımda FSB binası ögünde insanlar tutuldı: neler oldı (+foto)
Hatırlatamız, sentâbrniñ 4-nde Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirildi. Ondan ğayrı Qırımda sentâbrniñ 3-4-nde Rusiye quvetçileri Aziz Ahtemov, Asan Ahtemov, Eldar Odamanov, Şevket Useinovnı tutıp esir etti.
Rusiye quvetçileri beşini de Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay eken. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Cumaertesi künü beş qırımtatarı tutulıp esir etilgen soñ, Rusiye polisi Aqmescitteki Rusiye FSBsiniñ idare binası ögüne kelip, semetdeşleriniñ bulunğan yerini bilmege istegen daa 40 insannı tuttı. Anda faal, vatandaş jurnalistleri ve daa evel tutulğan beş qırımtatarınıñ soy-sopları bar edi. Daa soñra bir qısmı yiberildi.
Qırımtatar Milliy Meclisiniñ reisi Refat Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Qırım Muhtar Cumhuriyeti ve Aqyar prokuraturası Qırımda sentâbrniñ 3-nde ve 4-nde keçirilgen tintüvler ve insanlarnıñ tutulmasınen bağlı cinaiy tahqiqat başlatılğanı aqqında bildire.
