FSB işaretli Rusiye quvetçileri sentâbrniñ 3-nde saba Aqmescitte Qırım sakini Eldar Odamanovnıñ evini tintip, onı belli olmağan yerge alıp ketti. Qayd etilgenine köre, keçirilgen tintüv Aqmescit civarındaki Anğara (Perevalnoye) köyünde gaz borusınıñ patlatıluvınen bağlı.
Bu aqta Odamanovnıñ ömür arqadaşı Safiye Mamutova «Qırım birdemligi» cemaat birleşmesine haber etti.
«Saba Aqmescitte Qırımdaki Anğara köyünde olğan patlav sebebinde qırımtatarı Eldar Odamanovnıñ evinde tintüv keçirildi. FSB işaretli quvetçiler tehnikalarını alıp, er adamnı yanına alıp ketti. Al-azırda bu adam şeerniñ iç bir nevbetçi bölüginde yoq, apayı aqayı hırsızlanğanına dair poliske ariza berdi», – dep aytıla birleşmeniñ Facebook saifesinde.
Derc etilgen malümatqa köre, Odamanovlarnıñ evinde tintüv saba 6-da başladı.
«Özüni tanıtmaq ricasını körmemezlikke urğan haki urbada insanlar qorantanıñ cep telefonlarını toplap, mahkemeniñ Anğara köyünde gaz borusını patlatuvnen bağlı tintüv qararını kösterdi. Advokat Lilâ Gemeci, vesiqada tek evniñ adresi bar edi, dep qayd etti. Qararda soyadı ve qabaatlav qayd etilmedi. Quvetçiler yanına özüni tanıtmağan eki şaatnı ketirdi», – dep aytıla haberde.
Faallerniñ malümatına köre, tintüvden soñ quvetçiler eki noutbuk, eki cep telefonı ve eki malümat toplayıcısını tutıp aldı.
«Protokolda alınğan eşyalar cedveli tizilgen soñ, Eldar Odamanov uquq qoruyıcılardan müürli paket içinde olğanlarnı köstermelerini talap etti. Anda tintüv protokolında qayd etilgen cep telefonı yoq edi. Onı quvetçilerden biri alıp, belli olmağan yerge alıp ketken eken. Soñra onı qanunsız alda alınğan cihaznen beraber qaytardılar. Uquqiy alan tışında cep telefonında neler yapıldı belli degil», – dep qoştı «Qırım birdemligi».
Tintüv saba 07:20-ge qadar devam etti, dep bildire faaller, bundan soñ quvetçiler Odamanovğa olarnen beraber merkeziy polis bölügine baracaq, dep aytqanlar. Berilgen malümatqa köre, Mamutova nevbetçi bölükke telefon etti, amma aqayı ne anda, ne FSB ve İç işler nazirliginde yoq.
«Merkeziy rayonğa polis bölügine barıp keldim, ve aqayım hırsızlanğanına dair ariza yazdım, çünki 9:30-da telefon etip başlağanımdan berli onıñ bulunğan yeri aqqında bir şey bilmeyim», – dep ayttı Safiye Mamutova.
Mamutova, Facebook saifesinde qabaatlav «o qadar manasız» dep, tanışlarını tutıp alınğan cep telefonından onıñ adından kele bilecek şeylerge diqqatlı olmalarını ayttı.
Hatırlatamız, avgustnıñ 23-nde Kreml kontrolindeki Qırımnıñ İç işler nazirliginiñ idaresi Aqmescit civarındaki Anğara köyünde kimligi belli olmağan insanlar gaz borusına zarar ketirdi, dep bildirdi.
«Cinayet yeri baqılğan soñ, gaz borusına kimligi belli olmağan insanlarnıñ qanunsız areketleri neticesinde zarar ketirilgeni belli oldı», – dep aytıla haberde.
Rusiye quvetçileri «mülkni aselet yoq etüv ya da zarar ketirüv» sebebinden cinaiy dava açtı.
