Link açıqlığı

Saatnıñ esas haberi

Ukraina aq qorçalayıcı teşkilâtları yarımadada tutulğan qırımtatarlarnı azat etmege talap etti – beyanat


Nariman Celâlnıñ evinde tintüv. Biy Tanış, 2021 senesi sentâbrniñ 4-ü
Nariman Celâlnıñ evinde tintüv. Biy Tanış, 2021 senesi sentâbrniñ 4-ü

Ukraina aq qorçalayıcı teşkilâtları sentâbrniñ 3-nde ve 4-nde yarımadada Rusiye quvetçileriniñ tintüvlerinden soñ tutulğan beş qırımtatarınıñ azat etilüvine çağırdı. Bu aqta KrımSOS cemaat teşkilâtınıñ Facebook saifesinde derc etilgen ortaq beyanatta aytıla.

«İşğalci akimiyetniñ böyle areketleri hırsızlav olaraq tasnif etile bile, çünki quvet müessiseleri tutulğan şahısqa tuvğanlarınen ve advokatlarnen bağlanmağa bermey, sağlıqları ve ayatları içün telüke bar. İşğal yılları devamında BM Ukraina insan aqları monitoring missiyası ve aq qorçalayıcı teşkilâtlar yarımadada 40 insan hırsızlanuvını qayd etti», – dep aytıla beyanatta.

Aq qorçalayıcılarnıñ aytqanına köre, Qırımda «tintüv ve tutuvlar sistematik oldı».

«BM baş kâtibiniñ Qırımdaki insan aqları vaziyetine dair maruzasında soñki 3,5 yıl devamında tintüvlerniñ ekseriyeti qırımtatarlarnıñ evlerinde keçirildi, dep qayd etile. 85 qırımtatarı Qırımda siyasiy esaslı taqipler neticesinde azatlıqtan marum etüv yerlerinde buluna», – dep aytıla haberde.

Aq qorçalayıcılar, avgustnıñ 23-nde Kyivde Ukraina teşebbüsinen «Qırım platformasınıñ» sammiti keçirilgen soñ insanlar tutuldı, dep qayd etti.

«Qanunsız tintüvler, insan hırsızlanuvları ve Qırımda siyasiy mabüs sayısınıñ artması Ukraina ve halqara toplulıq ğayretleriniñ işğal altındaki yarımadada zulumnı toqtatmaq içün yeterli olmağanını köstere. Rusiye halqara uquqnı ihmal etmege devam ete, şunıñ içün Qırımda uquq üstünliginiñ ve insan menligine ürmetniñ ğayrıdan tiklenüvi tek yarımada işğali bitken soñ kerçekleşe bile», – dep bildirdi aq qorçalayıcılar.

Olar «Eldar Odamanov, Aziz Ahtemmov, Nariman Celâl, Şevket Useinov ve Asan Ahtemovnı ve diger siyasiy mabüslerni acele azat etmesine» çağırdı.

Hatırlatamız, Aqmescit rayonınıñ Biy Tanış köyünde sentâbrniñ 4-nde saba Nariman Celâlnıñ evinde tintüv keçirildi, bundan soñ onı mavı Volkswagen mikroavtobusınen alıp kettiler. Qırımtatar Milliy Meclisiniñ reisi Refat Çubarov Nariman Celâl Qırım ve Aqyardaki Rusiye FSBsiniñ binasında buluna, dep yazdı Facebookta.

Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.

Ukraina prezidentiniñ Qırım Muhtar Cumhuriyetindeki daimi temsilciligi qırımtatar faali Nariman Celâlnıñ tutuluvını tefsir etip, Rusiye uquq qoruyıcılarınıñ «Qırımtatar Milliy Meclisiniñ vekillerini taqip etüvnen» bağlı adımlarını takbih etti.

Ukraina Yuqarı Radasınıñ İnsan aqları vekâletlisi Lüdmila Denisova sentâbrniñ 4-nde qırımtatar faali Nariman Celâlnıñ tutuluvını Telegramda yazıp, «Rusiye FSBsiniñ hadimleri işğal etilgen Qırımda sahte davalar esasında Ukraina vatandaşlarınıñ evlerine sürip kirmege devam ete», dep ayttı.

Sentabrniñ 4-nde gece qırımtatar areketiniñ faali Nariman Celâl, Aqmescit rayonınıñ Biy Tanış (Pervomayskoye) köyünde saat 1:00 civarlarında Rusiye polisiniñ hadimleri Aziz Ahtemovnıñ evini tintti, soñra ise Ahtemovnı belli olmağan yerge alıp ketti, dep yazdı Facebook saifesinde.

«Qırım birdemligi» cemaat birleşmesiniñ soñki malümatına köre, Rusiye quvetçileri işğal altındaki Qırımda sentâbrniñ 3-4-nde beş insannı tutıp aldı: Aziz Ahtemov, Asan Ahtem, Nariman Celâl, Eldar Odamanov, Şevket Useinovnı.

Nariman Celâl – qırımtatar siyasetçisi, oca, siyasetşınas ve jurnalist. 2013 senesinden başlap Qırımnıñ Rusiye tarafından işğal etilüvinden soñ Meclis faaliyeti yasaqlanğanına qadar Qırımtatar Milliy Meclis reisiniñ birinci muavini, informatsion-analitik bölüginiñ reberi.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG