Aqmescit rayonınıñ Biy Tanış (Pervomayskoye) köyünde sentâbrniñ 4-nde saat 1:00 civarlarında Rusiye polisiniñ hadimleri Aziz Ahtemovnıñ evini tintti, dep yazdı qırımtatar areketiniñ faali Nariman Celâl Facebook saifesinde.
«Eldar Odamanov meselesinde olğanı kibi, (tintüv – QA) Aqmescit rayonınıñ Anğara köyünde olğan bir patlavnen bağlı eken. Tintüvden soñ Azizni alıp kettiler. Bulunğan yeri belli degil», – dep qayd etti Celâl.
Qırımtatar Milliy Meclisiniñ reisi Refat Çubarovnıñ Facebook saifesinde yazğanına köre, sentâbrniñ 3-nden 4-ne qadar «Rusiye polisi ve FSB hadimleri Aziz Ahtemovnıñ evine sürip kirdi, tintüv keçirdi, cep telefonlarını aldı ve ev saibini yanına alıp ketti».
«Al-azırda tutulğan Aziz Ahtemovnıñ ömür arqadaşı ve ana-babası bulunğan yerini bilmey, çünki bütün cezalandırıcı organlar (telefonlarğa baqmağan FSBden ğayrı) tutulğan kişi olarğa ketirilmedi, dep cevap bere», – dedi Çubarov.
İşğal etilgen Qırım müessiseleri bu malümatnı şimdilik tasdıqlamadı.
Hatırlatamız, bundan evel FSB işaretli Rusiye quvetçileri sentâbrniñ 3-nde saba Aqmescitte Qırım sakini Eldar Odamanovnıñ evini tintip, onı belli olmağan yerge alıp ketti. Qayd etilgenine köre, keçirilgen tintüv Aqmescit civarındaki Anğara (Perevalnoye) köyünde gaz borusınıñ patlatıluvınen bağlı.
Mamutova, Facebook saifesinde qabaatlav «o qadar manasız» dep, tanışlarını tutıp alınğan cep telefonından onıñ adından kele bilecek şeylerge diqqatlı olmalarını ayttı.
Hatırlatamız, avgustnıñ 23-nde Kreml kontrolindeki Qırımnıñ İç işler nazirliginiñ idaresi Aqmescit civarındaki Anğara köyünde kimligi belli olmağan insanlar gaz borusına zarar ketirdi, dep bildirdi.
«Cinayet yeri baqılğan soñ, gaz borusına kimligi belli olmağan insanlarnıñ qanunsız areketleri neticesinde zarar ketirilgeni belli oldı», – dep aytıla haberde.
Rusiye quvetçileri «mülkni aselet yoq etüv ya da zarar ketirüv» sebebinden cinaiy dava açtı.
