Sentâbrniñ 4-nde Aqmescitte FSB idaresiniñ binası ögünde qırımtatarlar kütleviy şekilde tutulğan soñ, sentâbrniñ 3-nde ve 4-nde tintüvler vaqtında Rusiye quvetçileri tarafından tutulğan Asan ve Aziz Ahtemovlarnıñ eki soyu poliste qala, dep bildire «Qırım birdemligi» cemaat birleşmesi Zarema Ahtemovanıñ malümatına esaslanıp.
Qadın, ekinci oğlu Arsen ve Aziz Ahtemovnıñ babası Eskender sentâbrniñ 4-nde gece qırımtatarlar kütleviy şekilde tutulğan soñ poliste qaldı, dep bildirdi. Onıñ malümatına köre, olarnı Rusiye Memuriy uquq bozuluvları kodeksiniñ 19.3 maddesine istinaden «polis hadiminiñ emrine riayet etmegeninde» qabaatlaylar.
Memuriy davalarnen bağlı oturışuvlar sentâbrniñ 6-nda Aqmescitniñ Kiyev rayon mahkemesinde keçirilecek, dep bildire birleşme.
Qırımdaki Rusiye İç işler nazirliginiñ idaresi tutulğanlarnen bağlı resmiy tefsir bermedi.
Hatırlatamız, sentâbrniñ 4-nde Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirildi. Ondan ğayrı Qırımda sentâbrniñ 3-4-nde Rusiye quvetçileri Aziz Ahtemov, Asan Ahtemov, Eldar Odamanov, Şevket Useinovnı tutıp esir etti.
Ukraina Tış işler naziriniñ birinci muavini Emine Ceppar Rusiye akimiyeti raatlıq künleri tutulğan beş insannı – Nariman Celâl, Aziz Ahtemov, Asan Ahtemov, Eldar Odamanov ve Şevket Useinovnı – Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay, dep bildirdi. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Cumaertesi künü beş qırımtatarı tutulıp esir etilgen soñ, Rusiye polisi Aqmescitteki Rusiye FSBsiniñ idare binası ögüne kelip, semetdeşleriniñ bulunğan yerini bilmege istegen daa 40 insannı tuttı. Anda faal, vatandaş jurnalistleri ve daa evel tutulğan beş qırımtatarınıñ soy-sopları bar edi. Daa soñra bir qısmı yiberildi.
Sentâbrniñ 6-nda saba faaller Rusiye polisiniñ hadimleri Aqmescitteki Rusiye FSB idaresiniñ binası ögünde tutulğan ve daa soñra yiberilgen qırımtatar faalleriniñ evlerine kelip başladı, dep bildirdi. Polis hadimleri «körüşip laf etmege» teklif ete.
Qırımtatar Milliy Meclisiniñ reisi Refat Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Qırım Muhtar Cumhuriyeti ve Aqyar prokuraturası Qırımda sentâbrniñ 3-nde ve 4-nde keçirilgen tintüvler ve insanlarnıñ tutulmasınen bağlı cinaiy tahqiqat başlatılğanı aqqında bildire.
Rusiye quvet müessiseleri raatlıq künleri Qırımda insanlarnıñ tutuluvına dair malümatnı resmiy şekilde alâ daa tefsir etmedi. Qırımnıñ Rusiye akimiyetine yaqın «Krıminform» saytı sentâbrniñ 5-nde uquq qoruyıcı organlardaki menbalarğa esaslanıp, «sentâbrniñ 4-nde cinaiy dava çerçivesinde operativ-tahqiqat tedbirleri keçirildi. Beş İnsan tutuldı, olarnıñ arasında Nariman Celâl da bar, sıñırlav tedbirleri meselesi baqıla», dep bildirdi.
