Ukraina Tış işler naziriniñ birinci muavini Emine Ceppar Qırım.Aqiqatqa izaat berip, Rusiye quvetçileriniñ Qırımtatar Milliy Qurultayınıñ delegatı Edem Dudakovnıñ evinde keçirgen tintüvini faal vatandaş areketleri içün «açıq intiqam» dep adlandırdı.
«Edem Dudakovnı şahsen tanıyım, qırımtatar milliy areketiniñ veteranı ola, Qurultay azası ola. Pek faal insan, soñki yılları qırımtatar halqınıñ medeniy mirası, hususan Han sarayınıñ qoruvına büyük diqqat ayırdı. Onıñ sayesinde işğalci memuriyetniñ Han sarayında keçirgen «rekonstruktsiya» vaqtında yapqan cinayetlerinden ve başqalarından haberimiz oldı. Şunıñ içün bu faaligi sebebinden açıq-açıq intiqam alalar, dep tüşünem», – dedi Ceppar.
Ukraina Tış işler naziriniñ birinci muavini, Rusiye akimiyetiniñ Qırımda yapqanları «sistematik ve meyilli» ola, dep qayd etti.
«Bugün Edem Dudakovnıñ evinde keçirilgen tintüvlerge baqıp, ilk sene tekrarlanmağan ve belli vazifeleri olğan sistematik ve meyilli areketler olğanını köremiz. Birinci vazife – faal vatandaş olğan insanlarnı taqip etmek. Ekinci vazife – qalğanlarnı qorqutıp areketsiz qaldırmaq. Üçünci vazife – er angi tirenüvni toqtatmaq», – dep bildirdi Ceppar.
Ceppar, Ukraina Tış işler nazirligi bu vaziyet sebebinden halqara ortaqlarına, hususan «Qırım platforması» çerçivesinde Dudakovnıñ evinde keçirilgen tintüv tafsilâtlarını berip, Rusiyege qarşı basqı quvetleştirmelerini rica etecek, dep bildirdi.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
Advokat Edem Semedlâyevniñ aytqanına köre, tintüvden soñ Dudakov Bağçasaray polis bölügine ketirildi, lâkin onı müvekkiline kirsetmediler.
Advokat Emine Avamilevanıñ aytqanına köre, «tintüv sebebi 2017 senesi içtimaiy ağlarnıñ qullanıcısınıñ yazğanları altında Edem Dudakovnıñ ekstremist izaatı olğan eken».
