Qırımtatar Milliy Qurultayınıñ delegatı Edem Dudakov Bağçasaray polis bölügine ketirildi. Bu aqta «Qırım birdemligi» cemaat birleşmesi advokat Edem Semedlâyevniñ malümatına esaslanıp bildirdi.
Qayd etilgenine köre, daa evel Semedlâyevni apiske alğan «E» merkeziniñ yolbaşçısı Ruslan Şambazov onı müvekkilinen körüştirmedi.
Semedlâyevniñ aytqanına köre, kirişte onı maden detektorı yardımınen baqıp, vesiqalarını incelediler. Soñra Şambazov uquqçını içeri almamağa emir etti.
«Podpolkovnik kelip, tışarıda bekleycem, dep ayttı. Kerek olsam, meni tapıp çağırırlar. Meni binadan çıqarğanlar, şimdi tışarıda bulunam, prokuraturağa daa bir şikâyet azırlaycam», – dep izaatladı Semedlâyev.
Advokat tintüv vaqtında da onı Dudakovnıñ yanına kirsetmediler, çünki keç kelgen ve tedbir başlağanda yoq edi, dep aytqanlar.
«Böyle mantıqnen bütün tahqiqat tedbirlerine yetişmek içün gece-kündüz müvekkillerimniñ yanında olmaq kerek», – dep qayd etti advokat. Quvetçiler araba qapudan baqmayıp, 15 metrge çekilmesini talap etkenler.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
