Qırımtatar Milliy Qurultayınıñ delegatı Edem Dudakovnıñ evinde tintüv keçirgen Rusiye quvetçileri advokatlarnı içeri almay. Bu aqta «Qırım birdemligi» cemaat birleşmesi haber etti.
«Uquqiy yardım içün kelgen advokatlar evge kirsetilmey. Uquqçıları – Edem Semedlâyev, Nazim Şeyhmambetov ve Emine Avamileva Edem Dudakovnıñ yanına keçmege tırışa», – dep aytıla haberde.
İlk malümatqa köre, tahqiqat tedbirleri saba 6:45-ten berli Ekstremizm ile küreş merkeziniñ hadimleri tarafından keçirile.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Fevralniñ 8-nde «Medeniyet saasındaki müessiselerge hızmet etüv ve inkişaf müdirligi» Rusiye devlet müessisesiniñ reberi İlya Alımçev Bağçasaraydaki Han sarayı binalarından biriniñ divarında «restavratsiya» vaqtında büyük çatlaq oldı, dep bildirdi.
Ukraina ombudsmanı Lüdmila Denisova Bağçasaraydaki Han sarayınıñ «restavratsiyası» vaqtında binalardan biriniñ zarar körmesini» «gumanitar uquq bozuluvı» dep adlandırdı.
