Qırımtatar Milliy Qurultayınıñ delegatı Edem Dudakovnıñ evinde keçirilgen tintüv sebebi içtimaiy ağlardaki izaatı oldı. Bu aqta advokat Emine Avamileva ayttı.
«Tintüv sebebi 2017 senesi içtimaiy ağlarnıñ qullanıcısınıñ yazğanları altında Edem Dudakovnıñ ekstremist izaatı olğan eken», – dep qayd etti uquqçı.
Onıñ aytqanına köre, izaatlarda ne bar edi belli degil. Advokatlar bunı em Dudakov, em Rusiye quvetçilerinen laf etken soñ bilmege ümüt ete.
Avamileva, tintüv vaqtında Dudakovnıñ bir qaç gaceti, hususan cep telefonları ve malümat taşıyıcıları alındı, dep qoştı.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
Advokat Edem Semedlâyevniñ aytqanına köre, tintüvden soñ Dudakov Bağçasaray polis bölügine ketirildi, lâkin onı müvekkiline kirsetmediler.
