Ukraina Yuqarı Radasınıñ vekâletlisi Lüdmila Denisova Qırımtatar Milliy Qurultayınıñ delegatı Edem Dudakovnıñ evinde keçirilgen tintüvni izaatladı.
«Qayd eteyim ki, vaqtınca işğal etilgen Qırımda Ukraina vatandaşlarınıñ evlerinde keçirilgen tintüvler halqara normalarğa zıt kele ve er bir insannıñ şahsiy masuniyet aqqı kefil etilgen İnsan aqları ve esas serbestliklerni qoruv şartnamesiniñ 5-inci maddesini ve şahsiy ve qoranta yaşayışına ürmet aqqı – Şartnameniñ 8-inci maddesini boza», – dep aytıla haberde.
Denisova halqara toplulıqnı Rusiye quvetçileriniñ işğal etilgen Qırımda yapqanlarına cevap bermesine ve yarımadada insan aqlarınıñ bozulmasına ileride yol bermemek içün Rusiyege qarşı basqı quvetleştirmesine çağırdı.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
Advokat Edem Semedlâyevniñ aytqanına köre, tintüvden soñ Dudakov Bağçasaray polis bölügine ketirildi, lâkin onı müvekkiline kirsetmediler.
Advokat Emine Avamilevanıñ aytqanına köre, «tintüv sebebi 2017 senesi içtimaiy ağlarnıñ qullanıcısınıñ yazğanları altında Edem Dudakovnıñ ekstremist izaatı olğan eken».
