Qırımtatar Milliy Qurultayınıñ delegatı Edem Dudakov milletlerara zıddiyet çıqarğanında qabaatlana. Bu aqta advokat Edem Semedlâyev «Qırım birdemligi» cemaat birleşmesine ayttı.
«Onı milletlerara zıddiyet çıqarğanında qabaatlay ekenler. Bu Memeriy uquq bozuvları kodeksiniñ 20.3.1 maddesinde bar. 2017 senesi bir paylaşuv altında milletlerara zıddiyet çıqarğan izaat qaldırğan eken. Ve bu izaat alâ daa (ağda – QA) bar eken, şunıñ içün uquq bozuvı devam ete, dep sayalar», – dedi advokat.
SEE ALSO: Ukraina ombudsmanı Qırımtatar Milliy Qurultayınıñ delegatı Edem Dudakovnıñ evinde keçirilgen tintüvni izaatladıSemedlâyevniñ aytqanına köre, yarınğa qadar Dudakov memuriy sebeplerden tutula. Memuriy uquq bozuvı qararını yarın saba Bağçasaray rayon mahkemesi baqmalı.
«Bu madde boyunca 10 biñden 20 biñge qadar para cezası, 100 saatqa qadar tüzetüv işleri ya da 15 kün memuriy apis cezası berile», – dep ayttı uquqçı.
O, Dudakovnıñ alı bir qarar, dep qoştı. «Qan basımı arttı, qulaqları tıqaldı. İlâcları bar edi, içti», – dedi Semedlâyev.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
SEE ALSO: Emine Ceppar Qırımda Dudakovnıñ evinde keçirilgen tintüvni «açıq intiqam» dep adlandırdıAdvokat Edem Semedlâyevniñ aytqanına köre, tintüvden soñ Dudakov Bağçasaray polis bölügine ketirildi, lâkin onı müvekkiline kirsetmediler.
Advokat Emine Avamilevanıñ aytqanına köre, «tintüv sebebi 2017 senesi içtimaiy ağlarnıñ qullanıcısınıñ yazğanları altında Edem Dudakovnıñ ekstremist izaatı olğan eken».