Türkiye Tış işler nazirligi sentâbrniñ 3-4-nde Qırımda qırımtatar faali Nariman Celâl ve daa dört qırımtatarınıñ tutuluvı sebebinden qasevetlengenini bildirdi.
Bu aqta nazirlikniñ matbuat kâtibi Tanju Bilgiç haber etti.
«Qırımtatar Milliy Meclisi reisiniñ birinci muavini Nariman Celâlnıñ bu saba (sentâbrniñ 4-nde) Qırımdaki evinde keçirilgen tintüvden soñ tutulıp belli olmağan yerge alıp ketirilgenini ve şimdilik bir haber alınamağanını bildik. Vaziyetni endişenen taqip ete, Nariman Celâl ve tutulğan daa dört qırımtatarınıñ tez vaqıtta evlerine ve qorantalarına qavuşmalarını tileymiz», – dep aytıla Türkiye Tış işler nazirliginiñ saytındaki haberde.
Hatırlatamız, Aqmescit rayonınıñ Biy Tanış köyünde sentâbrniñ 4-nde saba Nariman Celâlnıñ evinde tintüv keçirildi, bundan soñ onı mavı Volkswagen mikroavtobusınen alıp kettiler. Qırımtatar Milliy Meclisiniñ reisi Refat Çubarov Nariman Celâl Qırım ve Aqyardaki Rusiye FSBsiniñ binasında buluna, dep yazdı Facebookta.
Rusiye akimiyeti ile dialog qurmaq imkânsız, dep aytqan edi: Qırımda tutulğan Nariman Celâl nenen belli (fotoresimler)
Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidentiniñ Qırım Muhtar Cumhuriyetindeki daimi temsilciligi qırımtatar faali Nariman Celâlnıñ tutuluvını tefsir etip, Rusiye uquq qoruyıcılarınıñ «Qırımtatar Milliy Meclisiniñ vekillerini taqip etüvnen» bağlı adımlarını takbih etti.
Ukraina Yuqarı Radasınıñ İnsan aqları vekâletlisi Lüdmila Denisova sentâbrniñ 4-nde qırımtatar faali Nariman Celâlnıñ tutuluvını Telegramda yazıp, «Rusiye FSBsiniñ hadimleri işğal etilgen Qırımda sahte davalar esasında Ukraina vatandaşlarınıñ evlerine sürip kirmege devam ete», dep ayttı.
Ukraina Tış işler naziriniñ birinci muavini Emine Ceppar Qırım.Aqiqatqa vaziyetni tefsir etip, Qırımda Rusiye quvetçileriniñ areketlerini «siyasiy basqı» dep adlandırdı.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Qırım Muhtar Cumhuriyeti ve Aqyar prokuraturası Qırımda sentâbrniñ 3-nde ve 4-nde keçirilgen tintüvler ve insanlarnıñ tutulmasınen bağlı cinaiy tahqiqat başlatılğanı aqqında bildire
Sentabrniñ 4-nde gece qırımtatar areketiniñ faali Nariman Celâl, Aqmescit rayonınıñ Biy Tanış (Pervomayskoye) köyünde saat 1:00 civarlarında Rusiye polisiniñ hadimleri Aziz Ahtemovnıñ evini tintti, soñra ise Ahtemovnı belli olmağan yerge alıp ketti, dep yazdı Facebook saifesinde.
«Qırım birdemligi» cemaat birleşmesiniñ soñki malümatına köre, Rusiye quvetçileri işğal altındaki Qırımda sentâbrniñ 3-4-nde beş insannı tutıp aldı: Aziz Ahtemov, Asan Ahtem, Nariman Celâl, Eldar Odamanov, Şevket Useinovnı.
Advokat Ayder Azamatovnıñ bildırgenine köre, Asan ve Aziz Ahtemovlarğa qarşı Rusiye Ceza kodeksiniñ 281-inci maddesiniñ 1-inci qısmına istinaden cinaiy davalar açıldı.
Nariman Celâl – qırımtatar siyasetçisi, oca, siyasetşınas ve jurnalist. 2013 senesinden başlap Qırımnıñ Rusiye tarafından işğal etilüvinden soñ Meclis faaliyeti yasaqlanğanına qadar Qırımtatar Milliy Meclis reisiniñ birinci muavini, informatsion-analitik bölüginiñ reberi.