Sentâbrniñ 4-nde saba Qırımnıñ Aqmescit rayonındaki Biy Tanış (Pervomayskoye) köyünde meşur qırımtatar siyasetçisi, oca, faal, siyasetşınas ve jurnalist, Qırımtatar Milliy Meclisiniñ reis muavini Nariman Celâlnıñ evinde tintüv keçirildi. Tintüvden soñ Rusiye quvetçileri Celâlnı Aqmescitke alıp ketti.
Qırım.Aqiqat, Nariman Celâlnıñ Rusiye işğal etken Qırımda ve esas Ukrainada köstergen faaliyeti aqqında hatırlatmaq içün fotoresimlerini topladı.
Celâl Nariman Enver oğlu 1980 senesi Özbekistanda doğdı. 80-lerniñ soñunda qorantasınen beraber Qırımğa qayttı, Canköy mektebinde oqudı. Celâl ATR telekanalında alıp barıcı, «Avdet» gazetasında mühbir olıp çalışta ve Aqmescit halqara mektebinde tarih ve uquqşınaslıq derslerini berdi. 2013 senesinden ve Qırım Rusiye tarafından işğal etilgen soñ Meclis faaliyetiniñ yasağına qadar Qırımtatar Milliy Meclisiniñ reis muavini, informatsion-analitik bölüginiñ reberi.
Nariman Celâl Qırımda yaşay. Onıñ aytqanına köre, 2014 senesi mart ayında «Rusiye akimiyeti ile dialog qurmaq imkânsız olğanını añladıq». 2015 senesi martnıñ 27-nde Rusiye quvetçileri Aqmescit rayonınıñ Biy Tanış köyünde Nariman Celâlnıñ evini tintti. Celâl «fevral 26 davası» boyunca sorğuğa çağırılğan edi. O, beş saattan çoq devam etti
Nariman Celâl (ortada) «fevral 26 davası» boyunca oturışuv keçirilgen Aqmescitteki Rusiye mahkemesiniñ binası ögünde Bekir ve Aliye Degermencilernen tura. Dava mabüslerinden biri Mustafa Degermenci – Aliye tata ve Bekir ağanıñ oğlu
Nariman Celâl (ortada) «Veciye Kaşka davasınıñ» mabüslerine faal qoltutqan edi. Fotoresimde Aqmescitteki Rusiye binası ögünde tura, 2019 senesi yanvarniñ 24-ü
Nariman Celâl «Qırım birdemliginiñ» bütün körüşüvlerinde iştirak ete
2020 senesi sentâbr ayında Ukraina prezidentiniñ ofis reberiniñ birinci muavini Serğiy Trofimov (soldan) Nariman Celâlğa III derece «Yararlıqlar» nişanını berdi
Facebook Forum