Qırımnıñ rusiyeli akimiyetine tabiy olğan "Millet" telekanalına sentâbr 2-sinde dört yıl oldı. Bu kün kanalda bayram telemarafonı keçirildi, onıñ çerçivesinde seyircilerden ve Qırım ve Aqyar musulmanlarınıñ diniy idaresiniñ müftisi Emirali Ablayev kibi belli adamlardan, hayırlavlar aytıldı.
"Millet" telekanalına dört yıl oldı! Bu qısqa vaqıtta biz çoq şeyge iriştik ve seyircilerimizge kösterilecek şeyimiz çoqtır. "Millet" televizion kanalınıñ muabbet taqımı, tek qırımtatar halqınıñ eşqına degil de, Qırımda yaşağan bütün halqlarnıñ eşqına çalışa", - dedi kanal muarririyeti.
Qırımdan Rusiye Devlet Dumasınıñ mebusı Ruslan Balbek, kanalnıñ inkişafına müsbet qıymet kese.
"Dört yıl - telekanal içün çoq degil, men, şimdi şeküllenüv protsessi devam ete, dep aytar edim. Amma aynı vaqıtta bu, "Millet" telekanalınıñ Qırım haber alanında öz yerini tapqanı ve tarqaluvını keñleştirgeni işaretidir", – dedi o.
Rusiye prezidenti yanında milletlerara munasebetler Şurasınıñ azası, rusiye tarafını tutqan "İnkişaf" cemiyet teşkilâtınıñ reisi Eskinder Bilâlov da bu kün marafonda iştirak etti.
Mence, "Millet" yaratılması – büyük bir qazançtırEskinder Bilâlov
"Millet, mence, qırımtatar halqınıñ büyük yeñişi, çünki televideniye – tilimizni işletken yer, anda er kes qırımtatarca qonuşa ve tilni eşitmege imkân bar. Onıñ içün, mence, "Millet" yaratılması – büyük bir qazançtır", - dedi televizion efirde rusiye tarafdarı olğan faal.
Qırımnıñ rusiyeli ükümetinde Devlet milletlerara munasebetler komitetiniñ reisi Lenur Abduramanov, bayram marafonınıñ efirinde, kanalnıñ seyircileri yıl-yıldan ep arta, dep qayd etti.
"Bunıñ kerçekleşkenini quvanasın. Biz zamanları niyette olğan kerçekleşti, ve bugün biz bazı hulâsalarnı çıqaramız. Artuvğa, ilerlevge meyil bar, yani dinamika körüne ve bu büyük quvançtır", - dedi o.
Qırımnıñ rusiyeli başı Sergey Aksönov da "Millet" telekanalını dört yıllığınen hayırladı.
"Millet" – Qırım haber alanınıñ liderlerinden oldıSergey Aksönov
"Birinci efirden soñ keçken dört yıl içinde "Millet" – Qırım haber alanınıñ liderlerinden oldı, aqiqiy milliy kanal namını qazandı. Kanal taqımına ihtisaslılıq, mesüliyet ve icadiy yanaşuv içün minnetdarım. Siziñ işiñiz bölgemizde halqlar arası muabbetlikke, stabillikke, milliy medeniyet ve ürf-adetlerniñ saqlanmasına, başqa memleketlerniñ cemaatına qırımtatar halqınıñ yaşayışı aqqında kerçekni bildirmege yardım ete", – yazdı o Facebook saifesinde.
Qırımtatar cemaatçısı Zair Smedlâ, Qırım.Aqiqatqa tefsir bergende, "Millet" telekanalınıñ işi aqqında aytıp berdi.
"Aksönov "Millet" telekanalına haber alanıñ lideri, dep ayttı, "aqiqiy milliy kanal" adını qoydı ve "başqa memleketlerniñ cemaatına qırımtatar halqınıñ yaşayışı aqqında kerçekni bildirmege yardım ete", dep qayd etti. Semerelilikniñ köstergiçi – bu keri bağlanmaq imkânı ve telefon vastasınen rey berüv mümkünligi, amma adamlar, anda berilgen nomerge telefon etip olamadılar, çünki telefon teliniñ o bir tarafında "bu nomerge telefon etip olamaysız", ve muarrirler qoyğan saylavğa qarşı kimse rey berip olamadı. İşte, kerçekler böyle", – dedi o.
O körgeni kibi, "Millet"niñ seyircileri çoq degil.
"Büyükten-büyük para sarf etip ve neticede tek bir qaç biñ seyircige lâyıq olmaq, budır aqiqiy liderler ve netice, bütün energiya – boşuna. Bu kanalnıñ populârlığını YouTubedaki seyir etüvler ve abunecilik de köstere – üç biñden çoqça abunecisi olğan kanalnıñ videolarında eñ çoqu bir qaç yüz seyir etüvler ola, olar da qırımtatar estradasınıñ videoları. Olarnıñ liderleri mına böyledir! Hayırlayım!" – dedi cemaatçı.
Siyasetşınas Lenora Dülber, Rusiye akimiyeti "Millet" telekanalını populâr ATR kanalı yerine qoymağa istegenini hatırlata.
"Millet" telekanalı cemaat kanalı kibi yaratıla edi, amma biz Rusiyede matbuatnıñ yerini ve vazifesini pek yahşı añlaymız, anda o, akimiyet noqta-i nazarınıñ yayınlavınen biteLenora Dülber
"Bellesem, "Millet" kanalı ne şaraitte açılğanını hatırlatmaq kereklidir – tamam birinci qırımtatar ATR kanalınıñ Qırımda yayınlaması toqtatılğanından soñ. 2015 yılı müit daa kergin edi, ve ATRniñ qapatılması menfiy duyğularnı yarattı. Birinci qırımtatar telekanalınıñ yerini almağa qolay degil edi. Bir taraftan, qırımtatar media alanınıñ belli ustaları ve meşur şahıslarınıñ açıq jurnalistikadan çıqması, ekinci taraftan, qırımtatar informatsion mahsulınıñ tiklengen yüksek keyfiyeti ve oña raqip olmaq pek qıyın edi. "Millet" telekanalı cemaat kanalı kibi yaratıla edi, amma biz Rusiyede matbuatnıñ yerini ve vazifesini pek yahşı añlaymız, anda o, akimiyet noqta-i nazarınıñ yayınlavınen bite", – aytıp berdi Qırım.Aqiqatqa siyasetşınas.
Onıñ aytqanına köre, "Millet" ATRniñ yerini almadı, amma vaqıt keçkeninen öz seyircisini tapa.
Qırımtatarlarnıñ media alanı – ayrı bir mevzudır, ve onıñ aktualligini Ukraina qıtasında yayınlağan ATR telekanalı bereLenora Dülber
"Şimdi bizim rusiye telekanalımız bar, amma tek milliy örneknen ve fesnen. O, başqa, qırımtatarlarnıñ etrafında olğan kerçeknen bir kelmegen yaşayışnı yayınlay. Qırımtatarlarnıñ media alanı – ayrı bir mevzudır, ve onıñ aktualligini Ukraina qıtasında yayınlağan ATR telekanalı bere. O, qırımtatar mevzuyetinde trendlerni yarata, amma sırf qırımtatar olmasından vazgeçe. Bunıñ içün beş yıl keçkeninden soñ, qırımtatarlar olğan şaraitke alışmağa mecbur olğan soñ, televizorlarda "Millet" telekanalı peyda olıp başladı. Bu er yerde degil, amma adamlar öz aqqında malümatqa ve pozitivge muhtaclar. "Millet" ise bu vazifeni becere", - dep saya siyasetşınas.
Qırımtatar faali Edem Dudakov, rusiye akimiyeti içün "Millet" telekanalınıñ yapqan propaganda işi aqqında ayta.
Propaganda ceetinden, "Millet" şimdiki Qırım akimiyeti içün kerçekten bayağı şey becerdiEdem Dudakov
"Devlet matbuatınıñ meselesi şunda ki, olar jurnalistikanıpropagandanen şaşmalaylar. Propaganda ceetinden, "Millet" şimdiki Qırım akimiyeti içün kerçekten bayağı şey becerdi. ATR yoq etilgeninden soñ, o, halqara meydançıqlarda rusiye siyasetçilerniñ kontrargumenti oldı. Bu kanalnıñ yarıdımınen, yerli ziyalılar, Moskova içün "halqlar arası muabbetlik" süretini yaratıp oldı ve tamır halqqa qarşı akimiyet yapqan basqını rusiye vatandaşlarından gizlep oldı", - dedi faal.
