ATR qırımtatar telekanalı baş müdiriniñ sabıq muavini, Qırım jurnalisti Lilâ Bucurova aytqanı kibi, telekanal jurnalistlerinden iç birisi Qırımda telekanalnıñ işi toqtalğanından soñ akimiyet tarafdarı «Millet» telekanalında iş qıdırmadı.
«RİA novosti baş nazir muavini Ruslan Balbekke esaslanıp, «ATR telekanalınıñ hadimlerinden bir qısmı «Millet» telekanalınıñ yolbaşçılığından iş sorağanı» aqqında bildirdi. Şunı aytmaq isteyim: ATR jurnalistlerinden iç birisi, telekanaldan onıñ Qırımda yayınlavı toqtatılğanından soñ işten çıqmağan ve Kivge köçip ketmegenler de, «Millet» telekanalına ariza yazmadı», – dep bildire jurnalist Facebookta.
Onıñ aytqanı kibi, ATR Qırım komandası «Qaradeniz production» studiyasında çalışa.
«Bilgenime köre, «Millet»ke tek 2-3 operator ve aydavcı keçti», – dey Bucurova.
Avgust 10 künü Roskomnadzor «Millet» telekanalı ve «Vatan sedası» radiostantsiyasını kütleviy matbuat vastaları olaraq resmiyleştirdi. «Millet» akimiyet tarafdarı «Qırım» telekanalınıñ qırımtatar ve milliy programmaları departamenti esasında teşkil etildi.
«Millet» deñev yayınlavını sentâbr 1-de başladı.
ATR qırımtatar telekanalı 2015 senesi aprel 1-den Qırımda işini toqtatmağa mecbur edi. 2015 senesi iyün 17-den kanal Kiyevde işlemege başladı.
