Keriç politehnik kollecinde olıp keçken patlav ve atuv neticesinde 21 adam elâk olğan, daa 50-den ziyade hastahanelerde bulunmaqta. Vaqia aqqında oktâbr 17-sinde belli oldı. Gaz patlav rivayetinden terror eylemi ve kütleviy öldürüv rivayetinece sadece bir qaç saat keçti. Rusiye tahqiqatına köre, kollecde ücüm etken - dörtünci kurs talebesi Vladislav Roslâkov edi, o binanıñ içine patlayıcı maddeni ve silâni ketirgen. Qırım.Aqiqat jurnalistleri vaqialarnıñ hronologiyasını tikledi.
Başlanuv
Çarşenbe, oktâbr 17, 11:40. Keriçte patlav davuşı yañğıray. Şeerde olğan bütün acele yardım maşnaları yerli notitehnik kollecine aşıqa. Qırım matbuatı haber ete: binanıñ içinde gaz patladı.
Belli oldı ki - oquv yurtunıñ binası gaz ağına bağlanmağan
“Aşhanede patladı. Çoq adam zararlandı”, - dep videonı tefsir etip, onı içtimaiy aglarğa öz yerde bulunğanlar yüklegen.
Amma, yarım saattan bu rivayet endi tanılmay qaldı: belli oldı ki - oquv yurtunıñ binası gaz ağına bağlanmağan. Qurtarıcılar ve ekimler yaralanğanlarnı hastahanelerge alıp ketip başlay. Acele yardım maşnaları yetişmey, adamlarnı yengil maşnalarnen taşıylar.
“Cemaat naqliyatınen alıp kete ediler: marşrutka, avtobuslarnen”, - dep ayta o arada anda bulunğan Sergey.
Cesetler çoq. Bala cesetleri çoq. Aqiqiy terror eylemiOlga Grebennikova
Terror eylemi aqqında ilk aytqan kollec müdiri oldı. Patlav vaqtında o binada bulunmadı.
“Cesetler çoq. Bala cesetleri çoq. Aqiqiy terror eylemi. Menim ketkenine 5-mi, 10-mi daqqa keçken soñ birev sürip kirdi, hollnı patlattı, bütün camlar qırılıp dağıldı. Çapqalay ediler soñ, nasıldır patlayıcı paketlerni ata ediler. Soñ avtomatlarnen çapqalay ediler, ey, bilmeyim nenen. Ekinci qatta. Sınıf qapılarını aça ediler ve kimi öldürip olsalar, öldüre ediler. Mında episi, episi, episi bizimki. Aqiqiy terror eylemi, keregi kibi. Beslanda kibi”, - dep tasvir ete edi Keriç politehnik kolleciniñ müdiri Olga Grebennikova.
Bu arada kollec binasınıñ yanına silâ ve ağır maşnalar ile rusiye arbiyleri kele.
Vaqia yüz bergen yerge Kreml nezareti altındaki Qırım başı Sergey Aksönov da yol ala. Telefon bağında o haber ete: terror eylemini kollec studenti yaptı.
“Facia. 18 adam elâk oldı, yaralanğanlar 40-tan çoq. İhtimallı qatil özüni attı. O - bu oquv yurtunınıñ dörtünci kurs talebesi.. Müimi - şimdi vaziyet nezaret altında. Talebeni bu areketleriniñ sebepleri belgilene”, - dep haber ete Aksönov.
İçtimaiy ağlarda oğlannıñ elindeki tüfeknen süretleri endi peyda ola.
Mash internet-menbası vaqia şaatlarınıñ şaatlıqlarını yayınlap başlay.
“Bizde politehni patlattılar. Anda ata ediler, biz qaçıp başladıq. Biz qoradan sekirip başladıq. Men elimni tırnadım. Biz çapa edik, a balalar sadece yata edi”, - dep ağaly genç qız.
“Şu arada baqsam: ekinci ve üçünci qattan camlar uçıp başladı, amma ne tütün, ne bir şey - olmadı”, - dep ayta başqa ösmür.
Patlavdan soñ ilk saniyelerde çıqarılğan videoda atışlar eşitile. Azbarda olğan studentler, qatil kollec içinde adamlarnı atıp başlağanını daa añlamaylar.
Rivayetler
Vaqialar keçkeniñ sırasını ğayrıdan tiklegen rusiye tahqiqatına köre: Vladislav Roslâkov - öldürüvde şeklengen gençniñ adı - özü yapqan patlayıcınen çantanı aşhanede qaldırdı. Patlav yañğıradı, ondan soñ telaş başlandı. Roslâkov oquv işleri müdirini ve ocalardan birisini közlep attı, bundan soñ qalğanlarnı öldürip başladı.
Balalar, telefonlarına video çekip, çapa ediler, ceset körüp, başqa tarafqa aylana ediler.
Vaqia şaatlarından kimerleri, koridorda maskalı adamlarnı körgenlerini ayta. Studentlerden birisi, tek tüfek atışları degil de, avtomatnıñ devamlı atışlarını eşitti dep ikâye ete.
“Ocalarımıznen yaralanğanlarnı baqmağa kettik, o arada ögümizde avtomattan atıp başladılar. Daa eki metr keçip, köşeden çıqsa edik, em oldı. Tamam ekinci qattan köşeden avtomattan ata ediler. Avtomatnıñ devamlı atışları edi. E, tamam böyle, devamlı atışlar edi”, - öz yüzini köstermeyip dey oğlan.
Tamam bu kibi sualler facia kününde zarar körgenlerniñ ana-babaları ve soylarını eñ pek meraqlandıra edi. Sergey Aksönov ise qandıra edi: qatil bir özü ve maskasız edi. “O bir özü yüre edi em de bu körüne. Közetüv kameralarından videoyazılar bar”, - dep rusiye tahqiqatınıñ rivayetini tasdıqlap dey Aksönov.
Şeerde fevqulâde vaziyet ilân etildi, amma onı beş künden lâğu ettiler.
Qırım ve qomşu Rusiyeniñ hastahanelerinde 46 yaralanğan insan bulunmaqta, olardan üçü ağır alda.
Şeerde 40 künlük matem ilan etildi.
