Keriç sakinleri Voykov soqağındaki Politehnik kollecinde yüz bergen patlav aqqında içtimaiy ağlarda haber ete.
Patlav neticesinde pencerelerniñ çerçiveleri tüşti. İçtimaiy ağlarda elâk olğanlar ve yaralanğanlar bar olğanını bildireler. Yaralanğanlar olğanına dair resmiy bir malümat şimdilik yoq.
«Kerç – moy gorod» saytınıñ mühbiri bildire ki, patlav neticesinde yaralanğanlar bar. Qaza yerine «ilk yardım», qurtarıcılarnıñ maşinaları kele, rayonnı politsiya sarıp aldı.
Şaatlar avtomatlı uquq qoruyıcılar aqqında haber ete.
Qırım.Aqiqat tafsilâtlı malümat almağa tırışa.
«Krıminform» malümatına köre, kollecde gaz patladı. Haber agentligi bildire ki, ilk malümatqa köre, 10 insan elâk oldı, 50 kişi yaralandı.
«Keriç politehnik kolleci» – devlet bücet tasil müessisesidir, onıñ tesisçisi Qırımnıñ Rusiye tasil nazirligi ola. Müessise saytınıñ malümatına köre, mında aşçı, qaynaqçı, muasebeci, tehnolog ve berberler oquy.
