Keriçteki ücüm neticesinde elâk olğanlarnıñ sayısı 21-ge arttı. Bu aqta tibbiy hızmetler TASS agentligine bildirdi.
«Tahliye vaqtında uçaqta daa bir qızçıq can berdi. Elâk olğanlarnıñ sayısı – 21 insan», – dep bildirdi «Krıminform» agentligine Qırımnıñ felâket tibbiyeti cumhuriyet merkeziniñ müdiri Sergey Astankin.
Daa evel Keriçteki kütleviy öldürüvde elâk olğanlarnıñ cedveli aydınlatılğan edi. Şeerniñ Rusiye memuriyeti facia neticesinde 20 kişi elâk olğanını bildirgen edi.
Patlav çarşenbe künü Keriç politehnik kollecinde oldı. Rusiyeniñ terrorizmge qarşı milliy komiteti, kollecde bomba patlağanını bildire.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi».
