Amerika Birleşken Devletleri Rusiyeni sentâbrniñ 3-nde ve 4-nde Qırımda Rusiye quvetçileri tarafından tutulğan qırımtatar faali Nariman Celâl ve diger qırımtatarlarnı azat etmesine çağıra.
Bu aqta sentâbrniñ 5-nde aqşam Devlet departamentiniñ saytında derc etilgen beyanatta aytıla.
«Amerika Birleşken Devletleri sentâbrniñ 4-nde Qırımtatar Milliy Meclisiniñ reis muavini Nariman Celâl ve eñ az 45 diger qırımtatarınıñ Qırımdaki işğalci akimiyet tarafından tutuluvını qararlı bir şekilde takbih ete. Rusiye işğalci akimiyetini olarnı acele azat etmesine çağıramız», – dep aytıla beyanatta.
Vesiqada qayd etilgenine köre, «ABD avgustnıñ 23-nde olğan «Qırım platformasınıñ» sammiti vaqtında Qırım Ukraina olğanını tasdıqladı, ve ABD Ukraina suvereniteti ve topraq bütünligine qoltuta».
Aynı mündericeli beyanatnı daa evel ABD Ukraina elçihanesi yaptı.
Qırımda FSB binası ögünde insanlar tutuldı: neler oldı (+foto)
Rusiye quvetçileri Nariman Celâlnı işkencege oğrattı, dep bildireler Qırımtatar Milliy Meclisiniñ reisi Refat Çubarov ve Ukraina Tış işler naziriniñ birinci muavini Emine Ceppar.
Ceppar, Rusiye akimiyeti raatlıq künleri tutulğan beş insannı – Nariman Celâl, Aziz Ahtemov, Asan Ahtemov, Eldar Odamanov ve Şevket Useinovnı – Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay, dep hatırlattı. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Onıñ malümatına köre, Celâl ve eki doğmuş ağa-qardaş Ahtemovlarğa qarşı Rusiye Ceza kodeksiniñ «diversiyalar» maddesine istinaden cinaiy davalar açıldı.
Aq qorçalayıcı ve «Qırım birdemliginiñ» faali Lutfiye Zudiyeva ve advokat Emine Avamileva bildirgenine köre, Nariman Celâl Rusiye Ceza kodeksiniñ eki maddesine istinaden «diversiyağa yardım etkeninden» şübheli sayıla.
Hatırlatamız, Aqmescit rayonınıñ Biy Tanış köyünde sentâbrniñ 4-nde saba Nariman Celâlnıñ evinde tintüv keçirildi, bundan soñ onı mavı Volkswagen mikroavtobusınen alıp kettiler. Qırımtatar Milliy Meclisiniñ reisi Refat Çubarov Nariman Celâl Qırım ve Aqyardaki Rusiye FSBsiniñ binasında buluna, dep yazdı Facebookta.
Rusiye quvetçileri işğal altındaki Qırımda sentâbrniñ 3-4-nde Nariman Celâldan ğayrı daa dört insannı tutup esir aldı: Aziz Ahtemov, Asan Ahtem, Eldar Odamanov, Şevket Useinovnı.
Refat Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Qırım Muhtar Cumhuriyeti ve Aqyar prokuraturası Qırımda sentâbrniñ 3-nde ve 4-nde keçirilgen tintüvler ve insanlarnıñ tutulmasınen bağlı cinaiy tahqiqat başlatılğanı aqqında bildire.
