Aqmescitte sentâbrniñ 6-nda Rusiye kontrolindeki Kiyev rayon mahkemesi sentâbrniñ 3-4-nde Qırımda tutulğan qırımtatarlarnen bağlı oturışuvını başlata. Bu aqta Qırım.Aqiqat mühbiri haber ete.
Mahkeme Rusiye Memuriy uquq bozuluvı kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) memuriy uquqnı bozğanında qabaatlanğan Eldar Odamanovğa qarşı davanı baqmağa planlaştıra.
Mühbirniñ malümatına köre, Eldar Odamanovnıñ advokatı Lilâ Gemeci Kiyev rayon mahkemesiniñ binasına kirdi. Diñleyiciler binağa kirsetilmedi.
Mahkeme yanında polis hadimleri ve eki boş avtobus tura. Rusiye polisiniñ hadimleri kelgenlerden dağılmalarını megafon vastasınen talap etti.
Faallerniñ malümatına köre, sentâbrniñ 4-nde Aqmescitteki FSB idaresiniñ binası ögünde tutulıp, açılğan memuriy davalar (Rusiye Memuriy uquq bozuluvı kodeksiniñ 19.3 maddesi) sebebinden polis bölüginde qalğan Eskender Ahtemov ve Arsen Ahtemovnıñ mahkemeleri olacaq.
Mahkeme yanındaki skverni suvaralar, Aqmescit, 2021 senesi sentâbrniñ 6-sı
Mahkemeler raatlıq künleri keçirilgen tintüvlerden soñ Rusiye quvetçileri tarafından tutulğan Aziz ve Asan Ahtemovlar, Nariman Celâlnıñ davalarını baqmalı. Olarnıñ sıñırlav tedbirleri belgilenecek.
Aqmescitteki Rusiye mahkemesi ögünde, 2021 senesi sentâbrniñ 6-sı
Hatırlatamız, sentâbrniñ 4-nde Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirildi. Ondan ğayrı Qırımda sentâbrniñ 3-4-nde Rusiye quvetçileri Aziz Ahtemov, Asan Ahtemov, Eldar Odamanov, Şevket Useinovnı tutıp esir etti.
Rusiye quvetçileri beşini de Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay eken. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Cumaertesi künü beş qırımtatarı tutulıp esir etilgen soñ, Rusiye polisi Aqmescitteki Rusiye FSBsiniñ idare binası ögüne kelip, semetdeşleriniñ bulunğan yerini bilmege istegen daa 40 insannı tuttı. Anda faal, vatandaş jurnalistleri ve daa evel tutulğan beş qırımtatarınıñ soy-sopları bar edi. Daa soñra bir qısmı yiberildi.
Sentâbrniñ 6-nda saba faaller Rusiye polisiniñ hadimleri Aqmescitteki Rusiye FSB idaresiniñ binası ögünde tutulğan ve daa soñra yiberilgen qırımtatar faalleriniñ evlerine kelip başladı, dep bildirdi. Polis hadimleri «körüşip laf etmege» teklif ete.
Qırımtatar Milliy Meclisiniñ reisi Refat Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Qırım Muhtar Cumhuriyeti ve Aqyar prokuraturası Qırımda sentâbrniñ 3-nde ve 4-nde keçirilgen tintüvler ve insanlarnıñ tutulmasınen bağlı cinaiy tahqiqat başlatılğanı aqqında bildire.
Rusiye quvet müessiseleri raatlıq künleri Qırımda insanlarnıñ tutuluvına dair malümatnı resmiy şekilde alâ daa tefsir etmedi. Qırımnıñ Rusiye akimiyetine yaqın «Krıminform» saytı sentâbrniñ 5-nde uquq qoruyıcı organlardaki menbalarğa esaslanıp, «sentâbrniñ 4-nde cinaiy dava çerçivesinde operativ-tahqiqat tedbirleri keçirildi. Beş İnsan tutuldı, olarnıñ arasında Nariman Celâl da bar, sıñırlav tedbirleri meselesi baqıla», dep bildirdi.