Mahsus Qırım.Aqiqat içün
Estoniya prezidenti Kersti Kaljulaidniñ kantselâriysı, devlet başınıñ yubileyIne bağışlanğan Qırım şampan şişesini Rusiye elçiligine keri yolladı, dep haber etti Estoniya matbuatı.
Ebet, diplomatik müessisede qomşu devletniñ yetekçisi içün bahşışlarnıñ asılını bilmekke diqqat etmediler, dep tüşünmek mümkün. Amma Qırım vaziyetinde degil. Ediyeniñ özü de tesadufiy olmağanı ve bu ediyeniñ red etilmesi ile bağlı malümatnıñ aşkâr olğanı boş yerde peyda olmağanı aydındır.
Kreml, sanki aselet degil, Qırım şarabınen şişelerni Avropa Birligi memleketleriniñ devlet erbaplarına yapılğan bahşışlar arasına qoya. Bar da diqqat etmezler ve içerler. Ve iç olmadan böyleliknen "Qırım bizimki" olğanını qabul eterler
Moskova, dünyağa Qırım ilhaqınıñ qanunlığını tanıttırmaq içün bütün mümkün ve mümkün olmağan areketlerni becere. Yarımadanıñ işğalci akimiyetiniñ vekillerini resmiy Rusiye delegatsiyalarına qoşa. Çeşit-türlü içtimaiy ve medeniy tedbirlerni keçire. Ve mına, sanki aselet degil, Qırım şarabınen şişelerni Avropa Birligi memleketleriniñ devlet erbaplarına yapılğan bahşışlar arasına qoya. Bar da diqqat etmezler ve içerler. Ve iç olmadan böyleliknen "Qırım bizimki" olğanını qabul eterler. Ve er şey becerilse, o ya da bu siyasetçi, yarımadanıñ şübesiz Rusiye Federatsiyasınıñ qısmı olaraq tanımasa da, Qırım şarabından igrenmedi, dep aytmaq mümkün.
Amma sade bir sebep ile böyle şey iç olmaz. Dünyada, Rusiye akimiyeti 2014 senesinde yapqan halqara uquqınıñ bozulmasınen razılaşmağa istegenler yoq. Bir devlet başqa bir devletniñ qısmını ruhsetsiz özümsigeni normal bir şey kibi qabul etilse, bu insaniyetni 100 yılğa keri, Birinci ve Ekinci Cian cenki vaqıtlarına qaytarır, qanun küçü degil, küç qanunı ükümsirgen devirge atar.
Halqara uquqqa böyle munasebetniñ onlarca million adam qurbanı oldı, Avropanıñ bir çoq şeeri berbat etildi, olarnıñ millionlarnen sakinleri qaçaq oldı. Ve ebet, Qırım ilhaqı - o facialı adiselerniñ devamıdır, 1945 senesi uzaqlaşıp olğanımız deşetke qaytuvdır. Ve ceennemge keri qaytmaqnı başlağanlar, sakinleri yıllarnen "tek cenk olmasın" "muqaddes" sözlerinen akimiyetiniñ bütün cinayetlerini aqlağan memleket olğanı - tarihnıñ accı mısqılıdır.
Onıñ içün mesele şu şişede ya da içinde olğanında degil - şubesiz, Qırımnıñ şarapları pek lezetlidir. Mesele, şişe neniñ timsali olğanındadır.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, Kyivli jurnalist, Qırım.Aqiqat közeticisi
