Link açıqlığı

Saatnıñ esas haberi

Vitaliy Portnikov: Qırım divarı


Mahsus Qırım.Aqiqat içün

Medeniy dünya Berlin divarı tüşkeniniñ 30 yılını tek Avropa memleketlerinde kommunist diktaturalarınıñ bitüvi olaraq degil, Ekinci cian cenkinden soñ Ğarpnen Şarqnı ayırğan medeniy mania yoq olğanınıñ yubileyi olaraq qayd ete. O vaqıt, 30 yıl evelsi, biñlernen berlinli şeerniñ şarqiy qısmından Ğarpqa aşıqqanda, çoq insan umumiy qıymetler yalan ve propagandanen deñiştirilecek germetik qapalı dünya artıq olmaycaq, dep tüşüngen edi.

Amma optimistler yañıldı. Divar – o, tek toladan degil de. Daa ziyadesi, tola Berlin divarı bolşeviklerniñ Vatandaş cenkinde ğalebe qazanıp, Sovetler Birligi ve qalğan dünya arasında qurğan, Ekinci cian cenkinde ğalebe qazanğan soñ ise sovet işğaline oğrağan Avropa qısmında yayğan o fikir divarınıñ külminatsiyası oldı.

Qırım işğalinden soñ ise aqiqat ve yalan arasında divar tez-tez quruldı

Ve Berlinniñ eki qısmı arasında divar yıqılsa, fikir divarı bir daa olmaycaq dep tüşünmek telükeli bir yañlış fikir oldı, medeniy dünya kevşedi ve Putin rejiminiñ tiklenmesine, pekitilmesine, eski sovet cumhuriyetlerinde avtoritarizm ve halq idaresiniñ tantanasına, ve Merkeziy Avropa memleketlerinde populistlerniñ muvafaqiyetine yardım etti. Qırım işğalinden soñ ise aqiqat ve yalan arasında divar tez-tez quruldı. Ve bu körünmegen divar – Keriç köprüden qat-qat sağlam bir inşaat.

Qırım ilhaqından soñ Rusiye ve qalğan dünyanıñ siyasiy dünya haritaları internette bile farqlı oldı

Qırım ilhaqından soñ Rusiye ve qalğan dünyanıñ siyasiy dünya haritaları internette bile farqlı oldı. Halqara uquq normalarına dair fikirler farqlı. Rusiye mektep talebelerine tarih derslerinde bir şeyni yañlış ögretmeyler, bir vaqıt olmağan şeylerni ögreteler.

Rusiye televideniyesi seyircilerge «Qırım baari» ve Donbassnıñ «halq cumhuriyetleri» aqqında yalan ayta. Bütün memleket Orwellniñ cenk barışıq olğanınıñ eminliginde yaşay. Ve bu yalannıñ tesir küçü o qadar büyük ki, kerçek malümat menbaları bile millionlarnen insanğa olarnıñ devletinde ve dünyada neler olğanını añlamağa yardım etmey.

2014 senesinden soñ rusiyeliler aqiqatnıñ o bir tarafında qaldı. Yañı, Qırım divarınıñ arqasında.

«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

Vitaliy Portnikov, Kyivli jurnalist, Qırım.Aqiqat közeticisi

XS
SM
MD
LG