Sentâbrniñ 4-ünde rus quvetçileri bir qaç qırımtatarnıñ evinde tintüv keçire
Aqmescit rayonınıñ Boğurça (Kamenka) qasabasında rusiyeli telükesizlik hadimleri faal Marlen Mustafayevniñ evine tintüv keçirmek içün keldi. Onıñ azbar kirişini avtozak qapattı, rusiyeli telükesizlik hadimleri tintüv sepebini añlatmadı dep haber ete “Qırım birdemligi” birleşmesi.
Tintüvden soñ rusiyeli telükesizlik hadimleri Mustafayevni polis bölügine alıp ketti. Faalniñ qadına aytqanına köre, o Rusiye CK-niñ 282-nci maddesiniñ 1 qısmına (zıddiyet çıqaruv ve nefret doğıruvı, insan menligini aşalav) köre qabaatlana.
Advokat Edem Semedlâyev, oña müşterisinen körüşmege razılıq bermegenler ve bu mesele boyunca şikâyetni 30 kün devamında baqmağa işandırdılar dep ayta.
2017 senesi fevral ayında Marlen Mustafayevniñ evinde, “ekstremist timsaller”niñ numayış etilmesi sebebinden tintüv keçirilgen edi. Telükesizlik hadimleri Mustafayevniñ kompyüter ve bir qaç kitabını aldı. Mustafayevge qol tutmağa on adam keldi, olar olıp keçken vaqialarnıñ videosını çekip, içtimaiy ağlarda yayınladı. O adamlarnıñ episi keççe yaqalanğan edi. Daa soñra Mustafayev, “ekstremist teşkilâtlarnıñ timsalleriniñ numayışı ya da propagandası”nda qabaatlanıp 11 künge tevqif etildi, safdaşları ise - 5 künge. Faal 2017 senesi martnıñ 4-nde azat etildi.
Российские силовики проводят обыск в Крыму (фотогалерея)
Sentâbrniñ 4-ünde saba Eski Qırımda (Starıy Krım) rus quvetçileri birden eki tintüv keçirdi: faal Giray Kulametovnıñ anası - Zarema Kulametova ve faal Abdullah Yakubovnıñ evlerinde.
Zarema Kulametovanı bilinmegen yerge alıp kettiler dep haber etti qızı Riana Kulametova . Onıñ aytqanına köre, yaqalav vaqtında anası parkta 250 saatlıq mecburiy iş cezasını işlep ödey edi.
“O yerde bulunğan adam ikâye etkeni kibi, beyaz mikroavtobus ve boz maşna keldi, telükesizlik hadimleri anamnıñ yanına barğan, şeadetnameni köstergen ve özüni alıp ketkeni. Onen bağlanıp olamayım. Şimdi men Eski Qırımdaki evimiz yanına keldim, daa evel mında yaşay edik, mında bütün soqaq qapalı ve meni evge kirsetmeyler”, - dedi Riana.
Rusiyeli telükesizlik hadimleri qavğadan soñ Riana Kulametova ve babası Zekkiy Kulametovnı da yaqaladı.
Qırımtatar faal Abdullah Yakubovnıñ evinde rusiyeli telükesizlik hadimleri “tahqiqiy areketler” keçirmekte dep haber ete “Qırım birdemligi”.
Qırım.Aqiqat tafsilâtlarnı bilmege tırışa.
