Adliyeci Emil Kurbedinovnı Qırımda Rusiye İNN İdaresdine bağlı İslâm-Terek (Kirovskoye) Rİİ bölügine kirsetmeyler. Şimdi anda tintüvden soñ rusiyeli telükesizlik hadimleri tarafından ketirilgen Kulametovlar ailesi tutulmaqta.
Qırım.Aqiqat muhbiri haber etkenine köre, Eski Qırımdaki evinde tintüv yapılıp bitken Zekki Kulametov da Rİİ bölügine ketirildi. Ondan evel anda Zarema Kulametova ve onıñ üyken qızı Riana ketirilgen edi.
“Maña aytılğanına köre, dava materialları artıq azırlanğan ve imayem altındaki şahıslarnen mahkemede körüşirim denildi”, – dep izaatladı Qırım.Aqiqatqa adliyeci.
Ayrıca Kurbedinov onıñ bir imayeci olaraq dava materiallarınen tanışmağa kirsetilmeyuvi qaba hata olğanını ayttı.
Daa evel Aqmescit etrafındaki Kamenka qasabasında qırımtatar faali Marlen Mustafayevniñ evinde tintüv yapılğanı aqqında belli olğan edi. Daa soñra haber etilgenine binaen, tintüv Zarema Kulametovanıñ da evinde de ötkerilmekte. Onıñ qızı Riana Kulametova Qırım.Aqiqatqa bergen izaatında rusiyeli telükesizlik hadimleri anasını belgisiz tarafqa alıp ketkenleri aqqında haber etken edi. Ayrıca “tahqiqat areketleri” Eski Qırımda Abdullah Yakubovnıñ evinde de ötkerile.
Malümat derc etilgen maaldegece rusiyeli telükesizlik hızmetleri iç bir bir izaat bermedi.
Rusiye Qırımnı ilhaq etken soñ, mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan “Hizb ut-Tahrir” ile alâqaları olğanında şeklengen musulmanlarnıñ evlerinde sıq-sıq tintüvler keçirip başladı.
