Ukrayina Yuqarı Radası mayısnıñ 14-nde Qırımtatar halqı genotsidiniñ qurbanlarını añma künü munasebetinen halqara toplulıqqa muracaatnı 310 reynen taqdirledi. Muracaat hususan Rusiye tarafından qırımtatar aqları ve serbestliklerini bozulmasınıñ toqtatıluvınen bağlı edi. Bu aqta qırımtatar halqınıñ lideri ve Ukrayina halq deputatı Mustafa Cemilev Facebook saifesinde haber etti.
«Bugünki muracaat diger devletlerniñ ükümet ve parlamentlerini Latviya, Litvaniya, Kanada, Poloniya, Estoniya, Çehiya yapqanları kibi bu cinayetlerni genotsid olaraq tanımalarına ve Rusiyeni em keçmişte, em şimdi işğal etilgen Qırımda yapqan cinayetleri içün mesüliyetke çekmek içün ğayretlerini birleştirmege çağıra», – dep yazdı Cemilev.
Cemilevniñ aytqanına köre, rey berüv künü Ukrayina parlamentinde çıqış yapıp, o, «işğal etilgen Qırımda semetdeşlerimiz pek minnetdarlar. Devlet olarnı unutmadı ve erte ya da keç işğalciler topraqlarından quvulacaq», dep qayd etti.
«Qırımda işğalcilerniñ tamır halqnı Vatanından quvmaq ve Qırımnı Rusiye vatandaşlarınen toldurmaq içün kerçekleştirgen siyaseti, işğalcilerge qarşı er angi areket içün sert bir taqip, işğalci mahkemelerniñ insanlarğa Facebookta yazğanları içün bile bergen apis cezaları, apiste oğrağan insaniyetsiz işkenceler, insanlarnıñ hırsızlanuvı ve öldürilüvi, qullanılğan diger usullar Putin rejiminiñ Rusiyeniñ halqlarğa qarşı genotsid areketlerini devam ettirgenini köstere», – dep ayttı Cemilev.
Bıltır oktâbrniñ 9-nda Ukrayina Yuqarı Radası çetel devletleriniñ ükümetleri ve parlamentlerini qırımtatarlarnıñ 1944 senesi Qırımdan sürgün etilüvini qırımtatar halqınıñ genotsidi olaraq tanımağa çağırdı.
Dekabrniñ 18-nde Çehiya Senatı 1944 senesi qırımtatar sürgünligini genotsid olaraq tanıdı. Qayd etilgen 74 senatordan 70-i bu qararğa rey berdi.
Oktâbrniñ ortasında Estoniya parlamenti 1944 senesi sovet rejimi tarafından qırımtatar halqınıñ sürgünligi genotsid olaraq tanılğanı aqqında beyanatnı tasdıqladı.
Qırımtatar halqınıñ lideri Mustafa Cemilev Azatlıq Radiosına bergen intervyüsında Çehiya akimiyeti başqa memleketlerni 1944 senesi qırımtatar halqınıñ sürgünligini genotsid olaraq tanımağa iqna etmek içün öz tesirini qullanmağa söz berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
