Link açıqlığı

Saatnıñ esas haberi

Aqmescitte qırımtatarlar, sürgün etüv qurbanlarınıñ hatırasını sessizlik daqqası ile añdılar


Aqmescitte qırımtatar tedbiri, 2018 senesi mayıs 18
Aqmescitte qırımtatar tedbiri, 2018 senesi mayıs 18

Aqmescitte mayıs 18-de saat 12:00-de qırımtatarlar, qırımtatar halqınıñ Qırımdan sürgün etilmesi qurbanlarınıñ hatırasını sessizlik daqqası ile añdılar. Qırım.Aqiqat muhbiriniñ bildirgenine köre, hatıra işareti yanında 100-den ziyade kişi toplanıp, dua ile sürgün etüv qurbanlarınıñ hatırasını añdılar.

Toplaşqanlar ögünde qırımtatar faaliyetçisi Nariman Celâl çıqışta bulundı. O, kelgenlerniñ qırımtatar halqını sürgün etüv qurbanlarınıñ hatırasını ürmet ile añmaq içün kelgenlerini ve böyle tedbirlerniñ Qırımnıñ türlü şeerlerinde ve dünyada keçkenini hatırlattı.

Celâl: «Bu hatıra yüreklerimizde daima yaşaycaq. Biz, kim olsa olsun, bu ağrınıñ unuttırmasına yol bermeycekmiz. Eñ azından bir kişini – babası, qartanası, balalarını coymağan iç bir qırımtatar qorantası yoq. O yıllarda pek çoq ufaq balalar elâk oldı. Bu sebepten biz bu künni başqa bir şeyge çevirmege bermeycekmiz, ve toprağımızğa qaytıp olamağanlarnıñ episine ğam, ağrı ve hatıra borcumıznı qaytaracaqmız», – dedi.

Qırımtatar halqını Qırımdan sürgün etüv qurbanlarınıñ hatırasına matem tedbirleri keçken skverde Rusiye polisi ve OMONnıñ hadimleri ve içinde tahmin ile Rusiye gvardiyasınıñ hadimleri olğan üç avtobus buluna.

Mayıs 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.

Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.

XS
SM
MD
LG