«Bugün qırımtatarlarnıñ genotsidini tanığan yedinci memleket bar. Ebet, bu tanuv Ukrayina Yuqarı Radasından başlandı. Ve soñra Latviya, Litvaniya, Baltika memleketleri, soñra Kanada, Poloniya ve şimdi Çehiya. Biz Çehiya yolbaşçılığından, Çehiya parlamentinden öz tesirini qullanmaqnı rica ettik, başqa memleketler de bunı tanısınlar. Ve bu işte bizge yardım eteceklerini ayttılar», – dedi Cemilev.
Qırımtatar halqınıñ lideri qayd etkenine köre, Qırım muhtariyeti meselesini tek eski sovet, eski kommunist memleketleri añlaylar, diger memleketler içün bu «pek uzaq».
Cemilev Rusiyeniñ tesiri altında olğan memleketlernen sürgünlikniñ genotsid olaraq tanılmasını muzakere etmekniñ faydası yoq, dep qayd etti.
«Amma diger memleketlernen çalışmaq mümkün. Şahsen men Slovakiya parlamentiniñ spikerinen laf etken edim. Amma añlayım ki, şimdi artıq qolay olmaycaq, çünki anda [çoqusı] baş nazir Fitsoğa qoltuta», – dep qoştı Cemilev.
Qırımtatar halqınıñ lideri onıñ Almaniya Bündestagında genotsidni tanımaq mevzusında olacaq çıqışı aqqında malümat bar edi, dep ayttı. «Lâkin saylavlar sebebinden şimdi pek diplomatik olmaz dediler. Keçken soñ keliñiz degen ekenler», – dep yekünledi Cemilev.
Dekabrniñ 18-nde Çehiya Senatı 1944 senesi qırımtatar sürgünligini genotsid olaraq tanıdı. Qayd etilgen 74 senatordan 70-i bu qararğa rey berdi.
Oktâbrniñ ortasında Estoniya parlamenti 1944 senesi sovet rejimi tarafından qırımtatar halqınıñ sürgünligi genotsid olaraq tanılğanı aqqında beyanatnı tasdıqladı.
Oktâbrniñ 9-nda Ukrayina Yuqarı Radası çetel devletlerniñ ükümetleri ve parlamentlerini 1944 senesi qırımtatarlarnıñ Qırımdan sürgün etilmesini qırımtatar halqınıñ genotsidi olaraq tanımağa çağırğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
