Rusiyeniñ nezaretinde olğan Aqyarnıñ Lenino şeer mahkemesi niñ binası yanında polis hadimleri yañı "Qırım musulmanları davası" boyunca yaqalanğan semetdeşlerine qoltutmağa kelgen diñleyicilerniñ pasport malümatını yazıp alalar. Bunı "Qırım birdemligi" haber ete.
Haber etilgeni kibi, Aqmescitteki Kiyev rayon mahkemesiniñ binası yanında da tutulğanlarğa qoltutmaq içün adamlar toplaşıp başlağan
İşğal etilgen Qırımda fevralniñ 9-nda saba Rusiye quvetçileri Ansar Osmanov, Ernest Seytosmanov, Marlen Mustafayev ve Amethan Abdulvapovnıñevlerinde tintüv keçirdi. Neticede dört qırımtatar yaqalandı.
Fevrlniñ 9-nda saba Rusiye quvetçileri tarafından yaqalanğan qırımtatarlarnıñ aqrabaları, tintüvler saba saat 4-te başlanğanını, aynı zamanda telefon alâqası ve advokatlarnen bağlanmağa çaresi olmağanını bildirdiler. Tutulğan qırımtatar faali Ansar Osmanovnıñ ömür arqadaşı Meryem, saba keçirilgen tintüv vaqtında Rusiye quvetçileri kitaplar qoyıp ketkenini bildire.
"Qırım birdemligi" cemaat birleşmesinde qayd etkenleri kibi, tutulgan Ansar Osmanov, Ernest Seytosmanov ve Marlen Mustafayev "Qırım musulmanları davaları"nıñ mahkeme oturışlarına qatnağa faallerdir.
Rusiye Federal telükesizlik huzmeti, feralniñ 9-nda Qırımda keçirilgen tintüvlerden soñ tutulğan dört qırımtatarnıñ "Hizb ut-Tahrir" areketi ile alâqası olğanını ve "anayasağa qarşı faalit" etkenini bildire.
Ukraina TİN yolbaşçısınıñ birinci muavini Emine Ceppar qırımtatarlarnıñ evlerinde keçirilgen yañı tintüvlerni izaat etip, Rusiyeni "Qırımdan def olıp ketmege" ve qanunsız sürette tutulğan bütün Ukraina vatandaşlarını azat etmege çağırdı.
Qırım MC ve Aqyar şeeri prokuraturası Rusiye quvetçileriniñ qırımtatarlarnıñ evlerinde keçirgen tintüvlerden soñ Ukraina Ceza qanunnamesiniñ 162-nci maddesiniñ 2-nci qısmına binaen cinayet davasını açtı.
