Rusiye Federal telükesizlik huzmeti, feralniñ 9-nda Qırımda keçirilgen tintüvlerden soñ tutulğan dört qırımtatarnıñ "Hizb ut-Tahrir" areketi ile alâqası olğanını ve "anayasağa qarşı faalit" etkenini bildire. Bunı idareniñ matbut hızmeti haber etmekte.
"Federal telükesizlik hızmeti Rusiye İç işler nazirliginiñ Qırım Cumhuriyetindeki bölügi ile birlikte "Hizb ut-Tahrir" halqara terroristik teşkilâtınıñ (Rusiyede yasaq etilgen teşkilât) bölüginiñ faaliyetiniñ qarşısı aldı. Terroristik teşkilâtnıñ dört azası yaqalandı. Bölükniñ azaları hilâfetniñ yaratılması doktrinasına esaslanğan, dünya cemiyet institutlarını dağıtıp, bar olğan akimiyetni küçnen devirmek maqsadı olğan anayasağa qarşı faaliyetni omürge keçirdiler. Gizlilik qaidelerine riayet etip, olar yarımadanıñ sakinleri arasında terroristik mefküreni tarqattılar", - TASS devlet haber agenligi Rusiye FSB-siniñ beyanatından alıntı ketire.
İşğal etilgen Qırımda fevralniñ 9-nda saba Rusiye quvetçileri Ansar Osmanov, Ernest Seytosmanov, Marlen Mustafayev ve Amethan Abdulvapovnıñ evlerinde tintüv keçirdi. Neticede dört qırımtatar yaqalandı.
Fevrlniñ 9-nda saba Rusiye quvetçileri tarafından yaqalanğan qırımtatarlarnıñ aqrabaları, tintüvler saba saat 4-te başlanğanını, aynı zamanda telefon alâqası ve advokatlarnen bağlanmağa çaresi olmağanını bildirdiler. Tutulğan qırımtatar faali Ansar Osmanovnıñ ömür arqadaşı Meryem, saba keçirilgen tintüv vaqtında Rusiye quvetçileri kitaplar qoyıp ketkenini bildire.
"Qırım birdemligi" cemaat birleşmesinde qayd etkenleri kibi, tutulgan Ansar Osmanov, Ernest Seytosmanov ve Marlen Mustafayev"Qırım musulmanları davaları"nıñ mahkeme oturışlarına qatnağa faallerdir.
Ukraina TİN yolbaşçısınıñ birinci muavini Emine Ceppar qırımtatarlarnıñ evlerinde keçirilgen yañı tintüvlerni izaat etip, Rusiyeni "Qırımdan def olıp ketmege" ve qanunsız sürette tutulğan bütün Ukraina vatandaşlarını azat etmege çağırdı.
Qırım MC ve Aqyar şeeri prokuraturası Rusiye quvetçileriniñ qırımtatarlarnıñ evlerinde keçirgen tintüvlerden soñ Ukraina Ceza qanunnamesiniñ 162-nci maddesiniñ 2-nci qısmına binaen cinayet davasını açtı.
