Tutulğan qırımtatar faali Ansar Osmanovnıñ ömür arqadaşı Meryem, saba keçirilgen tintüv vaqtında Rusiye quvetçileri kitaplar qoyıp ketkenini bildire. Bunı Meryem "Qırım birdemligine" aytıp berdi.
Onıñ aytqanına köre, tintüvni 15 ile 20 arasında kişi keçirgen.
"Bizni aşhanege kirsettiler, tintüvni ise bala odasından keçirip başladılar. Qızım, minder tübüne eki kitap qoyğanlarını kördi", - dedi Meryem.
Rusiye quvetçileri nasıldır kitaplarnı qıdarğanlar ve Ansar Osmanovnıñ Ukraina vatandaşı pasportını tutıp alğanlar.
Rusiye quvetçileriniñ Meryem Osmanovanıñ aytqanlarına izaatları şimdilik yoq.
Hatırlatamız ki, işğal etilgen Qırımda fevralniñ 9-nda saba Rusiye quvetçileri Ansar Osmanov, Ernest Seytosmanov, Marlen Mustafayev ve Amethan Abdulvapovnıñ evlerinde tintüv keçirdi.
Fevrlniñ 9-nda saba Rusiye quvetçileri tarafından yaqalanğan qırımtatarlarnıñ aqrabaları, tintüvler saba saat 4-te başlanğanını, aynı zamanda telefon alâqası ve advokatlarnen bağlanmağa çaresi olmağanını bildirdiler.
