Qırımda fevralniñ 9-nda saba Rusiye quvetçileri qırımtatarlarnıñ evlerini tintti, bir qaç insan tutuldı, dep haber ete «Qırım birdemligi» cemaat birleşmesi.
«Regional faallerimizniñ malümatına köre, sabadan Qırımnıñ farqlı regionlarında bir qaç qırımtatarınıñ evinde tahqiqat tedbirleri keçirile», – dep aytıla haberde.
Faallerniñ malümatına köre, tintüvlerden soñ tutulğanlar:
- Osmanov Ansar İsmailoviç, Bağçasaray rayonı, Büyük Süyren (Tankovoye) köyü, Gagarin soq., 11. Tintüv yekünlendi, er adamı Qırımdaki FSB idaresine alıp ketirildi.
- Abdulvapov Amethan Necipoviç, Aqmescit, Beloye-5, Kürkçi soq., 20. Tintüv yekünlendi, er adamı Qırımdaki FSB idaresine alıp ketirildi.
- Mustafayev Marlen Ramisoviç, Qarasuvbazar, Aq Qaya (Belaya Skala) köyü.
- Seytosmanov Ernest Kazimoviç, Aqyar, Balıqlava rayonı, Hayto (Tılovoye) köyü, Lazurnaya soq. Tintüv yekünlendi, er adamı Qırımdaki FSB idaresine alıp ketirildi.
Al-azırda Rusiye quvetçileriniñ resmiy resurslarında tutuv ve tintüvler aqqında malümat yoq.
Human Rights Watch maruzasında 2021 senesi işğal etilgen Qırımda Rusiye akimiyeti diniy ve siyasiy sebeplerden taqip etmege devam etti, dep haber etilgen edi.
