Rusiyeniñ insan aqları vekâletlisi Tatyana Moskalkovanıñ bildirgenine köre, o, işğal etilgen Qırım ve Aqyar ombudsmenleri ve Rusiye kontrolindeki Müftilik ve Qırım ükümetiniñ vekilleri ile online körüşüv keçirip, neticesinde yarımadada «milletlerara birlik» üküm süre, dep ayttı.
«Regiondaki aq qorçalayıcılıq meselelerini muzakere ettik, hususan qırımtatarlarnıñ aq kefaletlerine diqqat ayırdıq. Subet vaqtında qayd etilgenine köre, soñki yıllarda yarımada vatandaşlarınıñ yaşayışını eyiliştirmek içün büyük iş yapıldı», – dep aytıla Moskalkovanıñ Instagram haberinde.
Onıñ aytqanına köre, yarımadada «nevbetini beklegen qorantalarnıñ yaşayış şaraitleri eyiliştirile, ealiniñ içtimaiy kefaletleri arttırıla».
«Qırım Cumhuriyeti – milletlerara birlik yeri» regional devlet programması muvafaqiyetnen yerine ketirile», – dep qoştı Moskalkova.
BM Baş kâtibi António Guterres Qırım Muhtar Cumhuriyeti ve Aqyarda insan aqlarınıñ vaziyetine dair üçünci maruzasını derc etti.
Maruzada berilgen malümat:
- Qırımda Rusiye FSBsi ve diger uquq qoruyıcı organları tarafından işkence ve sert yanaşuv, qabaatlılar mesüliyetke çekilmey;
- 43 insannıñ hırsızlanması ile alâqası olğan qabaatlı şahıslar cezasız qala;
- cinaiy davalarda qabaatlanğanlarğa kösterilgen bedava uquqiy yardım semereli degil;
- azatlıqtan marum etüv yerlerinde tutuv şaraitleri uyğun degil ve tibbiy yardım sıñırlana;
- jurnalistlerniñ zenaat işine kirişüv;
- yerli akimiyet organlarınıñ Qırımda barışıq toplaşuv keçirmek aqqında kirişüv;
- qırımtatarlarnıñ şahsiy evleri ivazsız yıqıla;
- zornen avuştıruv ve Qırımdan sürgün etüv, vatandaşlar Rusiyeden Qırımğa avuştırıla.
İyülniñ başında BM insan aqları Yuqarı komissarı Michelle Bachelet Qırımdaki insan aqları vaziyetine dair maruzanı taqdim etip, yarımadada işkence qullanıla ve söz serbestligi sıñırlanıla, dep bildirdi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
