Qırımda Qurman "Hizb ut-Tahrir davası" boyunca tahqiqatnı yekünlediler, şimdi cinaiy davanıñ malümatınen tanışma yapıla. Bunı Qırım.Aqiqatqa advokat Lilâ Gemeci aytıp berdi.
"Bugün dava malümatınıñ kopiyasını yaptıq. Kerçekten aytsam, daa episini oqumadım, amma oqıp yetiştirgenime köre, endi bir qaç meraqlı yerlerini qayd etip olam. Tahqiqatnıñ rivayetine binaen, müşterilerimizniñ qabaatını tasdıqlağan "Golos Krıma" gazetasınıñ bir qaç nushası oldı. Bu, 2010 senesinde dört nushada bastırılğan "Qırım ve Halifat" maqaleleridir. Olar, tintüv vaqtında Rüstem Emirüseinovnıñ çardağında sanki tapılğan", - dedi Gemeci.
Advokat, müşterisi Eskender Abdulğaniyevde yapılğan tuntüvde "Al-Vay" mecmuasınıñ (mecmuanı Lübnanda musulman birleşmesi bastıra - QA) bir qaç sanı alındı, dep qoştı. Daa evel Eskender, olarnı oña FSB hadimleri taşlap qoydı, dep bildire edi.
"Dava malümatında 2003 ve 2004 senesinde bastırılğan mecmualar qayd etilgen. Amma müşterim 1998-inci senesinde doğğanını közde tutsaq, altı yaşında olıp böyle mevzularnen meraqlanğanına pek inanmayım", - aytıp berdi Gemeci.
Rusiye kontrolindeki Aqmescit Kiyev rayon mahkemesiniñ qadısı Denis Didenko noyabrniñ 6-nda Qurmandaki «Hizb ut-Tahrir davasınıñ» üç mabüsini apiste qaldırdı. Rustem Emirüseinov, Arsen Abhairov ve Eskender Abdulganiyev 2020 senesi yanvarniñ 13-ne qadar tahqiqat izolâtorında qalacaqlar.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
