Rusiye kontrolindeki Aqmescit Kiyev rayon mahkemesiniñ qadısı Denis Didenko noyabrniñ 6-nda Qurmandaki «Hizb ut-Tahrir davasınıñ» üç mabüsini apiste qaldırdı. Rustem Emirüseinov, Arsen Abhairov ve Eskender Abdulganiyev 2020 senesi yanvarniñ 13-ne qadar tahqiqat izolâtorında qalacaqlar.
Bu aqta advokat Lilâ Gemeci Qırım.Aqiqatqa bildirdi.
«Qabaatlayıcı taraf endi standart olğan delillerni qullandı. Olar tahqiqattan saqlana, şaatlarğa tesir ete ya da delillerni yoq ete bile eken. Biz qarşı çıqtıq, tahqiqat yekünlendi, şaatlarğa ise lafta bile tesir etmeycekler, çünki bu davanıñ bütün şaatları, diger «Hizb ut-Tahrir davalarında» olğanı kibi, gizlengen», – dedi Gemeci.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
