SUDAQ – Qırımnıñ Rusiye yolbaşçısı Sergey Aksenov bildirgenine köre, mayıs bayramlarında Qırımnı 266,7 biñ turist ziyaret etti, onıñ aytqanına köre, bu raqam keçken seneniñ aynı müddetine köre 12% çoq ola. Qırımlı faaller vaziyetke nasıl qıymet kese, Qırım.Aqiqatnıñ maqalesinde oquñız.
Sergey Aksenovnıñ malümatına köre, raatlanğanlarnıñ 72%-ı Qırımğa Keriç köpründen maşina ve avtobuslarnen keldi, 25%-ı trennen, 3%-ı Rusiye zapt etken Ukrayına cenübiniñ topraqlarından qara yolnen keldi. Turistlerni tahminen 350 yerleştirüv vastası qabul etti, orta yüklev 50%-dan çoq oldı, inkişaf etken infrastrukturanen kurort kompleksleri 100% tolu edi, dep ayta Aksenov.
«Qayd eteyim ki, ekspertlerniñ aytqanına köre, Qırım raatlıq fiyatları ceetinden Rusiyeniñ eñ kelişken regionı olıp qala. Yaz raatlığı istekleri arta. Faal bron müddeti 120 künge çıqa, keçken senege köre kölemler 50% arttı. Turistler yahşı inkişaf etken kurort infrastrukturanen, qoranta raatlığına kelişken ötellerni, tedaviylev programmaları keniş olğan şifahanelerni ala. Eminim, turistik biznesniñ ğayretleri müsbet neticeler ketirecek, ve Qırımda raatlıq daa raat olacaq. Yüksek mevsim başlana», – dep bildirdi Aksenov «VKontakte» içtimaiy ağındaki saifesinde.
Muarririyet soaydını telükesizlik maqsadınen aydınlatmağan qırımlı faal, kurort Aluştanıñ sakini aytqanına köre, turistlerniñ çoqusı Büyük Yalta ve Aluştada oldı.
«Bir çoq yerleştirüv vastaları 100% tolu oldı, faal marketing yapmağanlar tolmadı, amma olar da az. Şarqiy Qırım kurortına er vaqıt daa keç keleler, yazda balalarnen. Ğarbiy taraf da böyle, tek soñki eki yılda anda ateşlerden sebep daa az raatlanğan bar. Cenübiy yalısı ise daima yıl boyu tola edi, mevsimlerarası yarı tola edi. Qırımnıñ hususiyeti bu», – dep ayttı tüşüncelerini Qırım.Aqiqatqa faal.
Qırımdaki turistik obyektlerniñ reberleri mayıs turistlerini çeşit aktsiyalarnen celp etmege tırıştı. Meselâ, «Taygan» arslanlar parkınıñ saibi Oleg Zubkov mayısnıñ 9-nda silâ ve zırhlı taqımlarda ayuv şeklinde «Boyevaya Rus» adlı yañı eykel tikti. İş adamınıñ fikirince, bu adım «vatanperver» Rusiye turistlerini onıñ parkına celp etmege yardım eter.
«Mayısnıñ 9-na ve doğğan künüme Sankt-Peterburg dostlarımdan maña vatanperver ediyesi», – dep qayd etti Zubkov.
Muarririyet soaydını telükesizlik maqsadınen aydınlatmağan Yalta sakini, cemaat faaliniñ Qırım.Aqiqatqa tarif etkenine köre, bir çoq rusiyeli alğan yollanmağa baqmadan Qırımğa barmadı.
İnsanlarnı Qırımda bir şeyler qorquzadır
«Qırım kurortlarınıñ turistlernen toluv vaziyetini tek şahsiy közetüvler degil, informatsion haberler de aydınlata. Bu künleri bir haber peyda oldı, bedava yollanmalarğa baqmadan, insanlar Qırım tedaviylev-şifahane müessselerine kelmedi. Başqa bir yerde ise satılğan yollanmalarğa baqmadan şifahanege bir insan bile kelmedi. İnsanlarnı Qırımda bir şeyler qorquzadır», – dep qayd etti cemaatçı.
Yerli sakinlerniñ aytqanına köre, Sudaqqa da çoq turist kelmedi.
«Sudaqta yalı kenarınıñ tamir etilüvi bir çoq insannı qorquzdı. Amma baş sebep bu degil. Esas mesele yerli turistik saanıñ semereligini teminlev yanaşuvındadır. Memuriyetniñ mesüliyetli memurları faal degil ve bu meselede kreativ olmay. Bazı plâjlar yalı kenarına qadar suvnen bozulğan, yalı kenarı ise darma-dağın. Ve böyle yanaşuvnıñ bir sıra misali bar. Bir çoq yerleştirüv vastası ucuz fiyatlar berdi, amma bu yardım etmedi», – dep ayttı Qırım.Aqiqatqa yerli ülkeşınas gizli qalmaq şartınen.
Ремонт набережной распугал майских туристов от Судака (фотогалерея)
Muarririyet soaydını telükesizlik maqsadınen aydınlatmağan aqmescitli qırımtatar cemaat faali Qırım.Aqiqatqa izaat berip, Qırımda mayıs bayramlarında çoq turist olmadı.
«Qırımda o qadar yerleşüv yerini toldurmaq içün kütleviy şekilde turistler olğanını körmedim», – dep qayd etti cemaatçı.
Bir çoq kişi Kefede mevsim olmaycaq, Keriç köprü patlatılsa, bütün Qırımda da olmaz, dep tüşüne
Kefeli qırımtatar faaliniñ Qırım.Aqiqatqa bildirgenine köre, turizm saasında çalışqan kefeliler regionda turistlerniñ sayısı az olğanından qasevetlene.
«Bir bayram is etilmedi. Kefe bazarlarında kelgenler pek az, tek yerliler ola. Satıcılar şikâyet etip, keçken yıllarnen qıyaslay – bu yıl büyük yanuv. Bir çoq kişi Kefede mevsim olmaycaq, Keriç köprü patlatılsa, bütün Qırımda da olmaz, dep tüşüne», – dep ayttı fikrini faal.
Феодосия в середине весны: прогулки возле порта с затопленным БДК (фотогалерея)
Köktebelde vaziyet daa beter. Bu aqta Rusiyeniñ Qırım işğalinden soñ mında köçken rusiyeli bloger Aleksandr Gornıy haber ete.
«Köktebel bütünley boş. Mevsim perspektivaları pek qarışıq. Ya aqılsızlıqtan, ya keçkende kirecem, ya da seyyar satıcılar olarnı aldata edi. Bugün bardım ve kimseni körmedim. Kefe de boş», – dep yazdı bloger içtimaiy ağdaki saifesinde.
Rusiye akimiyeti ilân etken «sarı» terror telükesiniñ seviyesi olğan Keriç kibi şeerlerni turistler esasen tranzitnen ziyaret ete, toqtasa da, çoq qalmay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.