Bugün Rusiye nezaretindeki Qırım mahkemeleriniñ ükümleri neticelerinde yüzden çoq bala babasız qaldı. Kimer cocuqlar babanı mektep bayramında körmez, baba qızını toy künü ozğarmaz, baba sportçu oğlunı yarıştan soñ quçaqlamaz. Bu balalarnıñ bazıları doğğanından berli babasını körmedi. Olarnıñ babaları siyasiy mabüslerdir.
Ana qorantanı birleştire, o, eki adam yerine balalarını baqa, östüre. Şimdi ise ana - küreşçi de oldı.
Qırım.Aqiqat Qırımdaki siyasiy davalar iştirakçileriniñ ömür qadınları aqqında ikâye ete. Bu yayında Mümine Saliyeva aqqında tarif etecekmiz.
"Tutıp almadılar, hırsızlap aldılar"
OCSEde qırımtatar seslerinden birisi - Mümine Saliyeva - uquq qoruyıcı, "Qırım balalığı"nıñ koordinatorı. Qırımda siyasiy mabüslerniñ balalarına qol tutuv ğayesi onıñ aqlına aqayı tutulğan künü keldi.
“Tamam şu ande, inanmazsız, amma tamam aqayımnıñ apis etilgeni kününde onıñ artından qapı qapalğan soñ, men balalarıma baqıp, bir şey yapmaq kerek olğanını añladım", - dep hatırlay Mümine.
Saliyevlerniñ qorantasında dört bala bar, evlerini Seyran on eki yıl devamında qurıp tura edi. Bitirdiler ise cemaat yardımınen - Seyran o vaqıt endi apis etilgen edi.
Seyran Saliyevni "Hizb ut-Tahrir" islâm teşkilâtına aitliginde qabaatladılar. Rusiyede o yasaqlanğan, Ukrainada ise - serbest faaliyet köstere.
Seyran 34 yaşında, o ekskursiya ötkericisi kibi çalışa edi, "Qırım birdemligi" bileşmesiniñ faali edi.
"Yaqında balalar "babam FSBde çalıştı", dep utanacaqlar, çünki bu kerçekten aram bir iştir", - 2017 senesi aqayınıñ tutulıp alınmasından soñ ayta edi Mümine.
O - aliy tasili olğan iqtisatçı, çalışa, aspiranturada oquy, dissertatsiya yaza. Balalarnı baqmağa aqayınıñ anası ve büyük oğlu Salih yardım ete.
"Bir yerge barmam kerek olsa, o baqa, pampers de deñiştire, pastasını da yapıp ola. Men raatım, oña işanmaq mümkün olğanını bilen. Onıñ daa bir çizgisi bar - men aşamağance, sofra başına oturmay. Çanağım boş olğanını körse, tek o vaqıt sofrağa keçe ve özü aşay. Aqayımnıñ bu çizgisi bar, şimdi oğlu da öyle", - dey Salihniñ anası.
Mayıs ayında Mümineni Bağçasarayda tutıp aldılar. Kimsege telefon etmege bermediler ve Ekstremizge qarşı merkezge alıp kettiler.
"Men olardan soradım: ne içün celpnameni evime ketirmediler ve adamcasına elime bermediler? Böyle tutulmamnı talap etken ne edi? Tutıp almadılar - hırsızlap aldılar", - dey Mümine.
Qadınnı yasaqlanğan teşkilâtnıñ timsallerniñ numayışında qabaatladılar. Rusiye quvetçileri, onıñ Facebook saifesinde, Rusiye "Hizb ut-Tahrir" teşkilâtınına aittir, dep sayğan, 2013 senesi derc etilgen yazını sanki taptı. Mümineni qabaatlı tanıp, oña 1000 ruble para cezasını berdi. O, öz faaliyetini toqtatmaycaq ola.
"Bu bizim qanımızda bar. Qırımtatarlar - küreşçilerdir, kimer qorantalarında bu ana sütünen berile", - saya faal.
Kene şu künü "Qırım birdemligi"niñ daa bir faali Lütfiye Zudiyevanı tutıp aldılar. Lâqayt olmağan qırımlılar, Mümine ve Lütfiyeniñ para cezasına kapiknen aqça toplap, tölediler. Mümine ise, Qırımdaki faallikke daa çoq qadın qoşulır, dep ümüt ete.
Devamı bar...
