Bağçasarayda mayısnıñ 30-nda Ekstremizm ile küreş merkeziniñ hadimleri qırımtatar faali, Bağçasaraydaki ekinci «Hizb ut-Tahrir davası» mabüsiniñ apayı Mumine Saliyevanı tutıp aldı. Bunı advokatlar Emil Kurbedinov ve Mammet Mambetov tasdıqladılar.
Kurbedinovnıñ bildirgenine köre, onı Rusiye Memuriy cinayetler kodeksiniñ 20.3 maddesine istinaden – yasaqlanğan timsallerniñ numayış etilmesinde – qabaatlaylar. İşbu madde boyunca memuriy apis cezası berilmekte.
Ekstremizm ile küreş merkezi vekilleri bunı açıq sürette daa izaatlamadı.
Bundan evel Canköyde Rusiye quvetçileri qırımtatar faali, aq qorçalayıcı ve vatandaş jurnalisti Lutfiye Zudiyevanı tutıp aldı. Onı da Rusiye Memuriy cinayetler kodeksiniñ 20.3 maddesine istinaden qabaatlaylar.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
