Canköyde Rusiye quvetçileri qırımtatar faali Lutfiye Zudiyevanı tutıp aldı. Bu aqta Qırım.Aqiqat mühbiri haber ete.
Faalniñ aqayı Seytasan Zudiyevniñ Qırım.Aqiqatqa bildirgenine köre, apayı bazarda tutuldı.
Onıñ aytqanına köre, Rusiye quvetçileriniñ üstünde «adiy urba» bar edi. Olar Seytasan Zudiyevniñ maşinasını blok etip, Lutfiyeden Aqmescitteki bölükke protokol tizilüvi içün kelmesini rica etti.
Qırımlı advokat Emil Kurbedinovnıñ malümatına köre, faal Rusiyeniñ Ekstremizm ile küreş merkeziniñ hadimleri tarafından tutuldı. Onı Rusiye Memuriy cinayetler kodeksiniñ 20.3 maddesine istinaden – yasaqlanğan timsallerniñ numayış etilmesinde – qabaatlaylar. İşbu madde boyunca memuriy apis cezası berilmekte.
Kurbedinovnıñ bildirgenine köre, Rusiye quvetçileri Zudiyevanı Aqmescitke alıp kete.
Rusiye quvet müessiseleri bunı daa izaatlamadı. Qırım.Aqiqat tafsilâtlı malümat almağa tırışa.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
