Qırımda Anğaradaki «gaz borusında diversiya davası» boyunca ağa-qardaş Aziz ve Asan Ahtemovlarnen beraber mahküm etilgen qırımtatar siyasetçisi ve faali Nariman Celâl cinaiy davanı bütünley sahte dep adlandırdı. Bu aqta advokat Nikolay Polozov Telegram kanalında bildirdi.
O, Celâlnıñ mahkemedeki çıqışınıñ bir parçasını derc etip, onı «qorqu bilmez insan, Ukrayınanıñ kerçek vatanperveri» dep adlandırdı.
«Bilesiñizmi, 2014 senesinden berli men, Asan ve Aziz vatanımızda serbest yaşadıq ve fikir ve tüşüncelerimizni ayttıq. Şimdi sualim bar: bu cinaiy davanı uydurğan ve bu sahte işte iştirak etken er kesniñ Qırımda mında tezden qaytacaqlarnı beklemege cesüri barmı?», – dedi Celâl Qırımdaki Rusiye mahkemesiniñ oturışuvında.
Advokatnıñ malümatına köre, bazarertesi künü, avgustnıñ 29-nda, Qırımda mabüsler Celâl ve ağa-qardaş Ahtemovlarnıñ soñki sözü olacaq. Soñra Rusiye mahkemesi üküm çıqarmaq içün mesleat odasına ketecek.
Rusiye akimiyeti ile dialog qurmaq imkânsız, dep aytqan edi: Qırımda tutulğan Nariman Celâl nenen belli (fotoresimler)
Avgustnıñ 23-nde «Qırım platforması» ekinci halqara sammitiniñ iştirakçileri Rusiyeni Nariman Celâlnı ve bütün qırımlı siyasiy mabüslerni acele azat etmesine çağırdı.
Rusiye qabaatlavı Nariman Celâl, Asan ve Aziz Ahtemovlar içün15 yıl koloniyada qalmalarını talap etti.
Bu yıl iyül ayında Nariman Celâl Rusiye mahkemesinde sözge çıqıp, «Qırımnen bağlı fikirlerini bir vaqıt gizlemedi, amma bir de bir qanunsız areketler manasına kelmey», dep bildirdi.
Sorğu vaqtında «gaz borusındaki diversiya davasınıñ» mabüsi Aziz Ahtemov işkencege oğratılğanı içün özüne iftira attı, dep bildirdi. İmaye de mabüslerniñ işkencege oğratılğanını ayttı. Rusiye quvetçileri qabaatlanğanlarnıñ işkenceleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
