Qırımda sentâbrniñ 3-nde ve 4-nde tintüvler vaqtında tutulğan eki doğmuş ağa-qardaş Aziz ve Asan Ahtemovlar apiske alındı. Bu aqta Qırım.Aqiqat mühbiri haber ete.
Aziz Ahtemovnıñ babası Eskender 10 künge apiske alındı. Asan Ahtemovnıñ qardaşı Arsen 15 künge apiske alındı. Eskender ve Arsen «politsiyağa itaat etmegeni» içün nezaret altına alındı. Ekisi de sentâbrniñ 4-nde Qırımdaki FSB binası ögünde tutuldı.
Advokat Safiye Şabanova sıñırlav tedbiri belgilengen mahkeme oturışuvından evel Aziz Ahtemovnen körüşti. Onıñ Qırım.Aqiqat mühbirine bildirgenine köre, Aziz Ahtemov ondan añlaşma tizilgen advokattan olaraq vazgeçti.
«Ekisi – Aziz ve Asan pek qorqa, başlarını kötermeyler. Başlarını egeler. Laf etmeyler, şokta olğanları belli. Tahqiqatçı (FSB tahqiqatçısı Vitaliy Vlasov – QA) tserber kibi turıp, qaba bir şekilde soray: «Saña añlaşma tizilgen advokat kerekmi?» Olar bedeniy basqı altında olmasa, kesen-kes maneviy basqı altında bulunalar, çünki alları yahşı degil», – dep bildirdi Şabanova.
Şabanovanıñ aytqanına köre, o, işkence izlerini körmedi, amma Aziz mahkemege uzun qollı urbada ketirildi, dep qayd etti.
«Betlerinden arıqladılar, sual bersem, betlerini egilteler. Ne sebepten vazgeçesiñ desem, kâğıtta maña yazıp cevap berdi: «Çünki başından berli başqa advokat oldı», – dedi o.
Hatırlatamız, sentâbrniñ 4-nde Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirildi. Ondan ğayrı Qırımda sentâbrniñ 3-4-nde Rusiye quvetçileri Aziz Ahtemov, Asan Ahtemov, Eldar Odamanov, Şevket Useinovnı tutıp esir etti.
Advokat Ayder Azamatovnıñ bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket Useinov ve Eldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Ukraina Tış işler naziriniñ birinci muavini Emine Ceppar Rusiye akimiyeti raatlıq künleri tutulğan beş insannı – Nariman Celâl, Aziz Ahtemov, Asan Ahtemov, Eldar Odamanov ve Şevket Useinovnı – Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay, dep bildirdi. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».
Rusiye quvet müessiseleri raatlıq künleri Qırımda insanlarnıñ tutuluvına dair malümatnı resmiy şekilde alâ daa tefsir etmedi. Qırımnıñ Rusiye akimiyetine yaqın «Krıminform» saytı sentâbrniñ 5-nde uquq qoruyıcı organlardaki menbalarğa esaslanıp, «sentâbrniñ 4-nde cinaiy dava çerçivesinde operativ-tahqiqat tedbirleri keçirildi. Beş İnsan tutuldı, olarnıñ arasında Nariman Celâl da bar, sıñırlav tedbirleri meselesi baqıla», dep bildirdi.
