Rusiye qabaatlayıcısı Qırımdaki «gaz borusında diversiya davasınıñ» üç mabüsi – faal Nariman Celâl ve qırımtatar faalleri, ağa-qardaş Asan ve Aziz Ahtemovlarnıñ 15 yıl koloniyada qalmasını talap etti. Bu aqta advokat Nikolay Polozov Telegram kanalında bildirdi.
«Prokuror mahkemeden Nariman Celâlnı ve ağa-qardaş Ahtemovlarnı diversiya yapqanında, patlayıcı cihazlarnı qanunsız taşığanında ve patlayıcı cihazınıñ kontrabandasında qabaatlı tanımasını talap etti. Devlet qabaatlayıcısı er bir mabüsniñ 15 yıl azatlıqtan marum etilmesini, 600 biñ ruble para cezası almasını ve azatlıqlarınıñ 1 yılğa sıñırlanmasını istep, ilk 3 yılını apishanede, qalğan 12 yılnı sert rejimli koloniyada keçirmesini talap ete», – dep bildirdi Polozov.
Onıñ aytqanına köre, reyeglamentke köre imaye tarafı munaqaşada söz alacaq, mabüslerniñ soñki sözünden soñ ise mahkeme üküm çıqarmaq içün mesleat odasına ketecek.
Sorğu vaqtında «gaz borusındaki diversiya davasınıñ» mabüsi Aziz Ahtemov işkencege oğratılğanı içün özüne iftira attı, dep bildirdi. İmaye de mabüslerniñ işkencege oğratılğanını ayttı. Rusiye quvetçileri qabaatlanğanlarnıñ işkenceleri aqqında bir malümat bermedi. İyülniñ 20-nde Rusiye kontrolindeki Qırım Yuqarı mahkemesinde imaye ve qabaatlav tatafları apiske alınğan Nariman Celâlnı sorğuğa çekti. O, «Qırımnen bağlı fikirlerini bir vaqıt gizlemedi, amma bir de bir qanunsız areketler manasına kelmey», dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
