Qırımda - qurğaqlıq. Evvelleri tap bu qadar daa olmağan edi. Qırım gidrometeomerkezi bildirgeni kibi, Aqmescit suv anbarında suv seviyesi bayağı eksildi. Ayan yapma gölüniñ seviyesi kritik 14%-ğa qadar azlaştı. Qarasuvbazar suv anbarında, kritik seviye 15%-ğa keldi. Tayğan yapma gölü aqqında endi hatırlamaylar bile...
Google haritasına baqsaq, mına bunı körmek mümkün.
Şarqiy Qırımnı suvnen temin etken Qarasuvbazar yapma gölünden deyerli bir şey qalmağanı açıq-aydındır. Yani, bu 15%-ğa men inanam. Em de Qırım gidrometeomerkeziniñ hadimi ne dep yalan aytsın?
Yandex haritasına baqsaq, alğışlamaq mümkün: er şeyni bulutlar sarıp aldı!
Ne suv seviyesi, ne başqa bir şey körüne. İstegende, dumannı da yaydırıp olalar!
Qırımda yağmurlar, kerçekten, çoqtan yağmadı. Erinmeyip, Kefe ava tahminleriniñ tarihını baqtım. Yandexke köre, soñki yağmurlar:
- oktâbr 11-inde;
- sentâbr 20-nde;
- avgust 5-inde;
- iyül 31-inde;
- iyül 13-ünde;
- mayıs 6-sında.
Bu yarım yılnıñ içinde. Ve bu sağanaqlar degil, yoq! İşte, bir-eki sepeledi.
Amma daa yaramayı bar - gidrometeomerkeziniñ tahminlerine köre, yaqın künlerde ava deñişecegine ve yağmur yağacağına ümüt yoq. Yağmur-qarlar asıl yağmaycaq. Müessise hadimi, bu yıl vaziyet daa ciddiy olğanını qayd etip, 1994-ünci senesinden 2012 senesine qadar ava alını misal olaraq ketirdi.
O yıllarda küzde yağanaqlar oldı, şimdi ise, eñ azından noyabr soñuna qadar yağmaycaq. Qurğaqlıqnıñ sebebi tek sıcaq avada degil, amma dağlarda yağanaqlarnıñ qıtlığında da.
Ava tahmini saytı bunı tasdıqlay: belki de, on künden soñ bir şeyler sepeler.
Qırım akimiyeti ise, iç bir telüke olmağanında ve yarımada martqa qadar suvnen temin etilgeninde emin. Ondan soñ ise, köklerden bar da bir şeyler tamar.
Şimdilik ise Qırımda anomal sıcaq ava ve pek az yağanaqlar. Noyabrniñ 10-unda absolüt ava araretiniñ rekordı qoyuldı - sıfırdan yuqarı 27,1 derece.
Armen Haçaturov, kefeli bloger (müellifniñ adı ve soyadı telükesizlik maqsadınen deñiştirildi)
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
