Link açıqlığı

Saatnıñ esas haberi

Qırımlılarnıñ mektüpleri: Qırımnıñ daa bir "suv meselesi"


Qıta Ukrainadan ilhaq etilgen Qırımğa suv berilmesi toqtatılğan soñ, qırımlılarnıñ bir sıra suv meseleleri peyda oldı. Amma Qırım parlamentiniñ spikeri Vladimir Konstantinov, Qırımnıñ Dnipro suvına ihtiyacı artıq yoq, dep ayta.

"Bizge Ukrainadan suv kerekmey. O - pek kirli. Maña yaqında mütehassıslar ayttı ki, Qırımğa kelgen suv - onkologiya hastalıqlarınıñ sebebi edi. Anda ne aqqanını kimse nezaret etmey... Şimdi öz meselelerini özleri çezsin", - dedi Konstantinov.

Belki, şahsen oña kerekmeydir, adiy bir qırımlı içün köterilmez fiyatta eñ yahşı suvnı o, ne 2014 yılından evel, ne de ondan soñ özüne satın ala bile. Amma Qırımnıñ qalğan sakinleri Dnipro suvına ket-kete daa çoq ihtiyac duya.

Birinci çiftçiler peşman oldı - Dnipro suvunıñ olmağanından sebep, tarlalarnıñ suvarılması toqtatıldı, köy hocalığınıñ kimer saaları yoq oldı, misal içün pirniç östürmesi. Ve vaziyet ep yaramaylaşa - yarımadanıñ şimali ve cenüp-şarqında topraqlar tuzlaşa, böyle topraqlarda ise kiyik ot bile ösmey.

Yerastı suvlarnıñ qısqa müddet devamında qullanılması zararsız edi, amma şimdi olğan kölemde daimiy qullanuvı - büyük bir hatatır ve onıñ fiyatı da paalığa çıqacaq


Tuzlanuv, hususan, yerastı suvlarnıñ büyük kölemde qullanılması içün de ola, yani olar sadece ğayrıdan toplanıp yetiştirmey. Şimdilik yerastı suvlar ealiniñ suv teminatı meselesini çezmege yardım ete, amma yıl-yıldan olarnıñ yedekleri azlaşa - ve yaqında Qırımda daa büyük tatlı suv yetmemezligi meselesi peyda olacaq. Yerastı suvlarnıñ qısqa müddet devamında qullanılması zararsız edi, amma şimdi olğan kölemde daimiy qullanuvı - büyük bir hatatır ve onıñ fiyatı da paalığa çıqacaq.

Dnipro suvunıñ olmamazlığı sebebinden Ermeni Bazarda «Qırım titanı» zavodı qullanğan ekşilik havzularından çıqqan himiyeviy taşlantılar faciası oldı. Havuzlarda suv azlaştı ve ekşilik, adam ve tabiatnı zeerlep, buvlanıp başladı. İşte, böylece yañı telüke peyda oldı - qırımlılarnıñ yañı suv probleması.

Mesele şunda ki, bu yıl yağmur suvunen bağlı bir hucur adise oldı. Qullanmaq içün yağmur suvunı toplağan adamlar, onıñ yağlı qatqı olğanını duydı. Yağmur suvunen tolu çapçaqlar evel çirki ve sineklnen tolu edi, şimdi ise "cansız" tura - tiri bir şey anda yoq!

Qullanmaq içün yağmur suvunı toplağan adamlar, onıñ yağlı qatqı olğanını duydı


Bu yıl domatis bereketi de keregi kibi olmadı. Tüpler qurıp kete edi, ösken domatisniñ ise, çoqusı alda, qattı beyaz mili bar edi. Er kes Ermeni Bazardan kelgen ekşilik yağanaqlarınıñ neticesi, dep tüşüne. Adamlar teplitsa domatislerini almağa mecbur oldı.

Çoqusınıñ yüzüm bağları zararlandı. Salqımlarnıñ sıfatı hasta edi. İste, başqa ösümliklerniñ de aynı. Misal içün, Qarasuvbazar rayonında şimşirler qurıp ketti. Daima yeşil turğan dülber çegerler qurı sipirkige çevirildi. Şahsen men bunı Qarasuvbazar hastahanesiniñ yanında kördim.

Adamlar o qadar qorqalar ki, Aqmescitte Salğır boyu sanki boyalanğan yeşil gazonlarğa saqınıp baqa edi. Amma, o sadece mahsus gazon otunıñ saçılması edi eken,

İşte, işlerimiz böyle. Ket-kete qorqunçlıca ola...

Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

XS
SM
MD
LG