Qırımtatar faaliyetçisi, bloger Nariman Memedeminovnıñ işi boyunca tahqiqat, onda Ukraina vatandaşlığı olğanını tanımaq istemedi. Qırım.Aqiqat muhbiri, bu, mayıs 22-de Rusiyege tabi Qırım Yuqarı mahkemesiniñ oturışuvı esnasında belli oldı, dep bildire.
Mahkeme, advokat Emil Kurbedinovnıñ apellâtsion şikâyetini red etti. Onda o, tahqiqatnıñ, imayesi altında olğan şahısnıñ anketa malümatlarına onda Ukraina vatandaşlığınıñ olğanını kirsetmekni red etkenini qayd etti.
Advokat: «Biz Kiyevskiy rayon mahkemesine FSB tahqiqatçısı Aleksandr Parşutinniñ areketlerine qarşı şikâyet berdik. O, Nariman Memedeminovda Ukraina vatandaşlığınıñ olğanına dair anketa malümatlarını işke kirsetmek istemedi. Kiyevskiy rayon mahkemesi, şikâyetimiz printsipial ceetten baqılmağa tabi degil, dep qarar berdi. Bugün Yuqarı mahkeme bu qanunsızlıqnı öz qararı ile tasdiqladı. Men, bu printsipiallik neden ibaret olğanını añlamayım. Bu, menim tarafımdan qorçalanğan şahıslarda Ukraina vatandaşlığınıñ olğanını tanımağa istemegen birinci tahqiqatçı degil», – dep qayd etti.
Nariman Memedeminov advokatnıñ şikâyetine qol tuttı ve tahqiqatçınıñ areketlerine absurd, dedi. O: «Bu, babamnıñ adını ya da soyadımnı nazar-itibarğa almamaqnen aynıdır», – dep ilâve etti.
Prokuror mahkemeniñ oturışuvında şikâyetniñ qanaatlendirilmesine qarşı itiraz bildire edi ve «tek bir Rusiye vatandaşlığınıñ olması, adliyege irişüvni sıñırlamay», dedi.
Rusiyeniñ kontroli altında olğan Aqmescitniñ Kiyevskiy rayon mahkemesi qırımtatar faaliyetçisi, vatandaş jurnalisti Nariman Memedeminovğa tevqifni dört ayğa uzattı. Memedeminov tahqiqat izolâtorında ağustos 15-ke qadar qalacaq.
Mart 22-de Rusiyeniñ telükesizlik ve polis hadimleri Bağçasaray rayonında Nariman Memedeminovnıñ evini tinttiler. Bundan soñ faaliyetçi Aqmescitteki Rusiye FSBsi idaresine sorğuğa alıp ketildi. Mart 23-te mahkeme Memedeminovnı mayıs 16-ğa qadar tevqif etti.
Mart 23-te QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun buzuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina jurnalistleriniñ milliy birligi (UJMB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve kenişletmek aqqınıñ bozuluvı» dedi.
Ukraina TİNi vatandaş faaliyetçisiniñ yaqalanmasını taqbih etip, ilhaq etilgen Qırımdaki Rusiye ukümetinden Nariman Memedeminovnıñ azat etilemsini talap ete.
