Qırım Muhtar Cumhuriyetiniñ prokuraturası qırımtatar faaliyetçisi Nariman Memedeminovnı azatlıqtan marum etüv vaqiası boyunca cinaiy işniñ yürütilmesini başladı. Bunı muessiseniñ matbuat hizmeti bildire.
Mart 23-te QMC prokuraturası, cümleden, Ukraina Cinaiy kodeksiniñ 146-nci maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (meskenniñ toqunılmazlığını bozuv) qayd etilgen cinaiy areketlerniñ alâmetleri boyunca malümatnı Mahkemeden evelki tahqiqatlarnıñ umumiy cedveline kirsetti.
Bildirüvde: «Meselâ, 2018 senesi mart 22-de Bağçasaray rayonınıñ Zalanköy (Holmovka) köyünde, Qırım Muhtar Cumhuriyetiniñ vaqtınca işğal etilgen territoriyasında qanunsız olaraq meydanğa ketirilgen uquqqoruyıcı organlarnıñ vekilleri, evelden kelişken bir gruppa şahıslar olaraq, silâ qullanıp ve zorbalıq qullanacaqları ile qorquzıp, Nariman Memedeminovnıñ evini tintti ve onı azatlıqtan marum ettiler», – denile.
Mart 26-daki vaziyetke köre, mahkemeden evelki tahqiqat devam ete, dep qayd ettiler prokuraturada.
Mart 22-de Rusiye telükesizlik ve uquqqoruyıcı organlarnıñ hadimleri Nariman Memedeminovnıñ Bağçasaraydaki evini tinttiler. Bundan soñ faaliyetçi Aqmescitteki Rusiye FSBsi idaresine sorğulamaq içün alıp ketildi. Mart 23-te mahkeme Memedeminovnı mayıs 16-ğa qadar tevqif etti .
2016 senesiniñ fevralinde Memedeminovnıñ evi endi tintilgen edi. 2017 senesi iyül 13-te Rusiyeniñ kontroli altında olğan Bağçasaray rayon mahkemesi Memedeminovğa qarşı memuriy işni baqqan edi. O, güya 2017 senesi aprel 13-te, o zaman evi tintilmekte olğan Seydamet Mustafayevniñ evi yanında resmiy izin alınmayıp yapılğan mitingde iştirak etkeninde qabaatlandı. O vaqıt, yurtdaşına qol tutmaq içün eviniñ yanında pek çoq qırımtatar toplandı, olarnıñ arasında Nariman Memedeminov da bar edi.
Qırım Rusiye tarafından ilhaq etilgen soñ Rusiye ukümeti mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve bunıñ kibi de Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evlerinde muntazam surette kütleviy tintüvler yaptıra.
