Martnıñ 22-nde Bağçasaray rayonı Zalanköy (Holmovka) köyüniñ sakini, qırımtatar faali Narima Memedeminovnıñ evine, rusiyeli küç idaresinin hadimleri ve uquqqoruyıcılar keldi. Bu aqta martnıñ 22-nde «Qırım birdemligi» cemaat teşkilâtınıñ Facebook saifesinde haber etilmekte.
Faalniñ bergen malümatina köre, Memedeminov yaşağan evniñ etrafı qamaşavğa alınğan, avtozaklar kelgen, küç idaresiniñ çeşit strukturaları mevcut, Nariman Memedeminovnıñ evinden ğayrı, bütün soqaq sarılıp alınğan.
««Qırım birdemligi» Nariman Memedeminovnıñ evinde yapılğan tintüvni Qırımdaki cemaat faalleri ve umumen vatandaş jurnalistikasına endirilgen darbe dep köre», – denilmekte haberde.
Teşkilât 2016 senesi fevralnn 11-nde onıñ evinde artıq tintüv yapılğanı ve 2017 senesi iyülniñ 13-nde Bağçasaray rayon mahkemesi qırımtatar faali Nariman Memedeminovke qarşı memuriy iş açqanı aqqında hatırlattı. Adliyeci Lilâ Gemeci bergen malümatqa binaen, faalni 2017 senesi aprelniñ 13-nde Seydamet Mustafayevniñ evinde tüntüv yapılğan maalde, onıñ evi ögünde sanki dersiñ, qanunsız miting keçirdi dep qabaatlan edi.Tintüv maalinde semetdeşine qol tutmaq maqsadınen pek çoq qırımtatar kelgeninde, olarnıñ arasında Nariman da bulunıp, vaziyeti aydınlatmaq içün video çeke. Ondan da ğayrı, o uquqoruyıcı organlar yapqan provokatsiyalarğa qarşı semetdeşlerini tutmağa areket ete, dep bildire faaller. Ancaq buña baqmadan, o qabaatlı dep tanılaraq, 10000 rublelik cöremenen cezalanğan edi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
