Ukrainanıñ Milliy jurnalistler birligi (UMJB) ilhaq etilgen Qırımda «söz serbestligine nevbetteki ucüm»den endişe duya ve mart 23-te yarımadada tevqif etilgen cemiyet jurnalisti, qırımtatar faaliyetçisi Nariman Memedeminovnıñ ve siyasiy qabaatlavlar boyunca tevqif etilgen diger şahıslarnıñ azat etilmesini talap ete.
Bu aqta mart 24-te birlikniñ saytındaki beyanatta bildirile.
Beyanatta: «Aqmescitte Nariman Memedeminovnıñ tevqif etilmesi – fikir serbestligi, cümleden İnternet ağı vastasınen yapılğan serbest şekilde informatsiyanı aluv ve kenişletüvniñ bozuluvıdır. Ukrainanıñ Milliy jurnalistler birligi halqara ve milliy jurnalistler birleşmelerini, aq-uquq qorçalayıcı missiyalarını ilhaq etilgen Qırım ve Aqyardaki qırımtatar faaliyetçilerine qol tutmaq ve Nariman Memedeminov ile diger siyasiy qabaatlavlar boyunca yaqalanğanlarnıñ azat etilmesini talap etmege davet ete.
Mart 22-de Rusiye telükesizlik ve uquqqoruyıcı organlarnıñ hadimleri Memedeminovnıñ Bağçasaraydaki evini tinttiler. Bundan soñ faaliyetçini Aqmescitteki Rusiye FSBsi idaresine sorğulamaq içün alıp kettiler. Mart 23-te mahkeme Memedeminovnı mayıs 16-ğa qadar tevqif etti.
2016 senesiniñ fevralinde Memedeminovnıñ evi endi tintilgen edi. 2017 senesi iyül 13-te Rusiyeniñ kontroli altında olğan Bağçasaray rayon mahkemesi Memedeminovğa qarşı memuriy işni baqqan edi. O, güya 2017 senesi aprel 13-te, o zaman evi tintilmekte olğan Seydamet Mustafayevniñ evi yanında resmiy izin alınmayıp yapılğan mitingde iştirak etkeninde qabaatlandı. O vaqıt, yurtdaşına qol tutmaq içün eviniñ yanında pek çoq qırımtatar toplandı, olarnıñ arasında Nariman Memedeminov da bar edi.
Qırım Rusiye tarafından ilhaq etilgen soñ Rusiye ukümeti mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve bunıñ kibi de Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evlerinde muntazam surette kütleviy tintüvler yaptıra.
