Link açıqlığı

Saatnıñ esas haberi

Qırımtatar Milliy Meclisiniñ reisi Refat Çubarov mayıs 18-de Kyivde qırımtatar halqına qarşı genotsid qurbanlarınıñ hatıra tedbirinde, Qırımğa «qırımtatar milliy-territorial muhtariyeti» statusınıñ berilmesi, «tarihiy adaletniñ zaferi» ve qırımtatar halqına ait aqlarnıñ qaytarılması olacaq, dedi.

Çubarov, qırımtatar halqınıñ 1944 senesinde Qırımdan sürgün etilmesini genotsid olaraq tanımağa davet etti ve, qırımtatar halqınıñ aqları tolusunen qaytarılmağance sürgün etüvniñ aqibetlerini def etmek mümkün olmaz, dedi.

Çubarov: «Tamır halqı olaraq öz taqdirimizni tayin etüv aqqımız, bir bütün ve parçalanmaz Ukrainanıñ çerçivesinde bizge tolu şekilde berilmek kerek… Ukrainanıñ ayrılmaz qısmı olğan Qırımtatar milliy-territorial muhtariyeti – yalıñız halqnıñ saqlap qalması ve inkişaf etmesiniñ garantiyası degil de, aynı zamanda Qırımnıñ deokkupatsiyasına doğru yapılğan aqiqiy ve tesirli bir adımdır. Böyle olmaq kerek», – dedi.

O, Qırımda etnik ukrainler ve qırımtatarlar fizikiy ve maneviy tazyiq altında yaşağanlarını, taqip etilgenlerini ve qorqutulğanlarını hatırlattı. Yarımadada tevqifler, tintüvler yapıla, insanlar alıp qaçıla, Qırımtatar Milliy Meclisi ise yasaq etildi.

Mayıs 18-de Ukraina prezidenti Petro Poroşenko, iş gruppası Anayasağa qırımtatar muhtariyeti statusına dair deñişmelerniñ uzlaştırılmasını yaqın vaqıtta bitirecek ve anayasa komissiyasına berecek, dep bildirdi. Bunı Poroşenko Kyivde qırımtatar halqına qarşı genotsid qurbanlarınıñ hatıra tedbiridne bildirdi.

Ukraina prezidentiniñ aytqanına köre, iş gruppasında bunıñ içün vaqıt «yeterli edi».

Kyivde mayıs 18-de Sofiyska meydanında Qırımtatarlarnı sürgün etüv qurbanlarınıñ hatıra kününe bağışlanğan rekviyem aqşamı keçe. Qırım.Aqiqat bu tedbirniñ canlı yayınını alıp bara.

Mayıs 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.

Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.

Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.

XS
SM
MD
LG