Kyivde Sofiyska meydanında Qırımtatarlarnı sürgün etüv qurbanlarınıñ hatıra kününe bağışlanğan rekviyem aqşamı keçe.
Qırım.Aqiqat tedbirden canlı yayın alıp bara.
Bildirilgenine köre, resmiy şahıslar ve Ukraina devleti rehberleriniñ çıqışları, rekviyem aqşamı ve umum Ukraina matem mitingi planlaştırıldı.
Miting bitken soñ «Haytarma» bediiy filmi kösterilecek.
Teşkil eticiler, olarnıñ tarafından temin etilgen telükesizlik tedbirleri ile alâqalı olaraq, aqşamnıñ musafirlerinden, onıñ başlağanından yarım saat evel kelmekni ve yanlarına şahsiyetlerini tasdiqlağan vesiqalar almaqnı rica eteler.
Mayıs 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
