Aqmescitteki «Hizb ut-Tahrir işi» figurantı Uzeir Abdullayev Aqmescit tahqiqat izolâtorından alıp barılğan Aqmescit şeer hastahanesindeki tibbiy teşkerüv, onda damar hastalıqları ve trombnıñ olmağanını kösterdi. Bunı izolâtornıñ rehberi, Abdullayevni tibbiy bölükte ziyaret etken soñ onıñ aqrabalarına ayttı, dep mayıs 13-te Azatlıq Radiosındaki rus hizmetiniñ muhbiri bildire.
Tahqiqat izolâtorı rehberiniñ aytqanına köre, Abdullayevniñ ayağındaki şişiklik keçti, sıcağı da normağa keldi, dep bildire onıñ aqrabaları. Aynı zamanda tibbiy bölükniñ hadimleri Abdullayevniñ aqrabalarına onıñ resmiy diagnozını ale daa söylemediler. Abdullayevniñ advokatları ve aqrabaları tarafından onı hastahanege yatqızmaq talabı yerine ketirilmedi.
Ondan ğayrı, Aqmescit tahqiqat izolâtorınıñ rehberi Abdullayevniñ aqrabalarına, kelecek aftanıñ başında onı tibbiy bölükten keri kamerağa keçirecekler, dedi.
Al-azırda Aqmescit tahqiqat izolâtorı ya da Qırımdaki Rusiye uquqqoruyıcıları tarafından bu malümatqa dair resmiy izaat berilmedi.
Daa evel Qırım advokatı Mammet Mambetov, Aqmescit tahqiqat izolâtorında Aqmescitteki «Hizb ut-Tahrir işi» figurantı Uzeir Abdullayevni ziyaret etip, sağlığınıñ eyilişkenini ayttı.
Mayıs 4-te, Aqmescit tahqiqat izolâtorında tutulğan Aqmescitteki «Hizb ut-Tahrir işi» figurantı Uzeir Abdullayevni Semaşko adına hastahanege alıp barğanları aqqında malümat peyda oldı.
Bunıñ arfesinde advokat Mammet Mambetov, Abdullayevniñ kritik vaziyeti aqqında haber berdi.
Aprel 30-da Uzeir Abdullayev Aqmescitteki tahqiqat izolâtorınıñ tibbiy bölügine keçirildi. Bundan evel Abdullayevniñ anası Dilâra Abdullayeva, oğlunıñ bir qaç künden berli yüksek sıcağı ve ayağında şişik ile şişiklik olıp, dayanılmaz ağrılar çekkenini bildirdi.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
